Ena ika7 ni June 2021, e vakataulewataka na Tsentralniy District Court of Chelyabinsk mai Rusia, ni cala o Brother Dmitriy Vinogradov. Ena vakatatabutaki me rua na yabaki.

Dmitriy Vinogradov

• Sucu: 1963 (Chelyabinsk)

• Me baleti koya: Rau veisere nona itubutubu qai susugi vei tinana. Dau taleitaka na qito chess, e kenadau sara kina. Veivakavulici sara ena koronivuli ni qito chess. Rau vakamau kei Zhanargul ena 1990. E va na luvedrau, le rua e tiko vata kei rau

  Dau via kila na vuna era vakacacana kina na tamata vinaka na vuravura, ra veicati tale ga. Vakacegui koya na kena isau vakaivolatabu. Papitaiso sara me iVakadinadina i Jiova ena 2014

Ena 2018, era vakalecaleca eso na vakailesilesi ni matanitu nira via kila na iVolatabu, ra qai veivosakitaka kei Dmitriy. Ena Janueri 2020, era kaya na vakailesilesi ni veivosaki qori sa rawa kina na ivakadindina me beitaki ni cala o Dmitriy. Oti e rua na vula, era curuma na ovisa nona vale, ia a sega ni tiko kina o Dmitriy.

E sega ni dau rai vinaka o Dmitriy, e dau tubu tale ga nona dra. E kaya: “Na kequ ituvaki vakayago, e sega ni vakatau kina noqu veiwekani kei na Kalou. Au marau vakalevu, e ka dokai tale ga vei au meu vakadinadinataki Jiova ena mataveilewai.”

Ratou dau wilika o Dmitriy kei na nona vuvale na iVolatabu, ratou dau vakasamataka tale ga vakatitobu. Ratou dau vakavakarau ena soqoni, ratou na tiko kina qai vakamacala. Qori sara ga na ka e vukei ratou vakavuvale me ratou veivolekati, ratou kabiti Jiova tale ga. E vakarautaki ratou tale ga ena veivakacacani. E kaya o Dmitriy: “Dua na ka e vukei keitou vakalevu na nodra masu na mataveitacini. O Jiova e rogoca nodra masu na yalododonu qo. Keitou mai vakila kina vakavuvale nona veivakalougatataki o Jiova.”

Eda vuli vakalevu vei ira na mataveitacini era yaloqaqa, ra qai marau ni vosota na veivakacacani. Nida vakasamataki ira na tacida e Rusia, eda duavata kina kei na ka e kaya na 2 Cesalonaika 1:4: “Oya na vuna keitou dau sakitaki kemuni kina ina ivavakoso ni Kalou ena vuku ni nomuni vosota kei na vakabauta ena veivakacacani kece kei na veika dredre oni sotava tiko.”