Ena ika3 ni June 2021, e vakataulewataka na mataveilewai na Industrial District Court of Kursk mai Rusia, ni cala e dua na veiwatini, kei na tolu na tacida tagane. Ena vesu o Brother Andreyev me va veimama na yabaki, o Brother Ryshkov ena vesu me tolu na yabaki. O Brother Bagratyan ena vesu me rua veimama na yabaki, na watina o Alevtina ena vesu me rua na yabaki. O Brother Vospitanyuk, ena vakatatabutaki me rua na yabaki, ena so tale ga na ka ena vakatatabu kina.

Andrey Andreyev

• Sucu: 1976 (Kursk)

• Me baleti koya: Rau vakamau kei Svetlana ena 1999, qai rua na luvedrau yalewa. Taleitaka me vulica na iVolatabu ni vakamacalataki vua na vakayacori ni parofisai ena iVolatabu. Papitaiso sara ena 2002

Alevtina Bagratyan

• Sucu: 1977 (Kursk)

• Me baleti koya: Ni se gone, e dau taleitaka na droini. Tekivu vulica na iVolatabu ni se goneyalewa, papitaiso sara ena 1997. Rau vakamau kei Artem ena 2012. E dau veikoti ulu, gauna vata qori e qaravi tinana tiko

Artem Bagratyan

• Sucu: 1972 (Abovyan, Armenia)

• Me baleti koya: Toki mai Rusia, qai sotavi Alevtina e Kursk. Rau taleitaka vakaveiwatini me rau sarava na veika buli. Papitaiso sara ena 2000

Andrey Ryshkov

• Sucu: 1987 (Kursk)

• Me baleti koya: Takali o tamana ena gauna se gone lailai kina. E dau susugi koya vakalevu o tukana, ni cakacaka tu o tinana. Taleitaka me vulica na iVolatabu ena gauna e saumi kina na veika e lomatarotarotaka tu ena dua na gauna balavu. Papitaiso ena 2011, rau vakamau kei Marina ena 2016. E dau vakavinakataka na vale (apartment)

Ena ika16 ni Okotova 2019, era vaqaqara na vakailesilesi ni Federal Security Service (FSB) ena nodra vale e levu na iVakadinadina i Jiova e Kursk, ra vakatarogi tale ga. Ratou vesu kina o Brother Andrey Andreyev kei rau na Bagratyan. Ena ika21 ni Janueri 2020, sa qai vesu o Brother Ryshkov. A sere mai o Alevtina Bagratyan ena ika17 ni Tiseba 2020, ni oti e 13 na vula nona vesu tu me wawa veilewai. Qo e vakatabui me biubiu mai nona vale. Ratou se vesu tiko e tolu na tacida tagane.

E matenisuka tiko o Artem Bagratyan, qai duidui na vanua rau vesu tu kina kei watina. E kaya o Alevtina: “Au sega ni kila na kena ituvaki, e bula vinaka tiko se tauvimate. Dua na ka noqu nanumi koya.”

Ia e nuidei o Alevtina ni o Jiova ena taqomaki ratou ena gauna dredre qo. E kaya: “E vakaukauataki au tu ga o [Jiova]. Au kila ni na sega vakadua ni biuti au. Au vakadeitaka tale ga ni na vukei au tu ga.”

Eda nuidei ni o Jiova ena vaka e dua na valececere kaukaua vei ratou na tacida qo ni ratou waraka tiko na macala ni veilewai.—Vosa Vakaibalebale18:10.