Ena ika19 ni Seviteba, 2019 ratou beitaki qai bala e valeniveivesu e le ono na tacida tagane baleta ga ni ratou iVakadinadina i Jiova ena siti o Saratov, e Rusia.

E tauca na kedratou itotogi na Turaganilewa o Dmitry Larin, ena Mataveilewai ni Yasana na Leninsky District Court e Saratov. E totogitaki o Brother Konstantin Bazhenov kei Brother Aleksey Budenchuk me rau tolu na yabaki, ono tale ga na vula e valeniveivesu. O Brother Feliks Makhammadiyev me tolu na yabaki. Ratou ya rua na yabaki o Brother Roman Gridasov, Brother Gennadiy German, kei Brother Aleksey Miretskiy. Gauna ratou na sere kina e vakatabui me ratou veiliutaki ena dua na isoqosoqo e veiqaravi raraba vei ira na lewenivanua, me oti mada e lima na yabaki. Ia e kerea na nodratou loya me rogoci tale nodratou kisi.

Ratou beitaki taumada na le ono tacida qori ni ratou basulawa, ni oti ga nodra curuma vakatawadodonu na vakailesilesi e Rusia e vitu nodratou vale na tacida e Saratov ena ika12 ni June, 2018. Ratou vakavuvale kece na tacida qori, o Brother Budenchuk ga se vuli tiko e rua na luvena. Ratou vesu me ratou wawa veilewai tu me dua na yabaki o Brother Budenchuk, Brother Bazhenov kei Brother Makhammadiyev.

Ena itinitini ni nodratou ivakamacala ena mataveilewai, ratou cavuqaqataka e vica vata na tikinivolatabu veiuqeti. Ratou kaya tale ga ni ratou sega ni cudruvi ira na beitaki ratou.

Na matanitu o Rusia sa beitaki ratou tiko na le vitu na tacida tagane, ratou sa vesu tale ga. Sivia na le 250 na mataveitacini era beitaki tale ga nira basulawa, e le 41 era vesu tu mera wawa veilewai (e valeniveivesu), kei na le 23 era vakatabui mera biuta nodra itikotiko.

Meda nanumi ira ena masu na mataveitacini kece e Rusia ena nodra yalodina qai yaloqaqa. ‘Me vakaukauataki ira mada ga na nona kaukaua levu [o Jiova] mera vosota kina na kece ena vosovoso kei na marau.’—Kolosa 1:11.