Ena ika20 ni Epereli, 2017 ena gauna e vakatabuya kina na nodra cakacaka na iVakadinadina i Jiova na Mataveilewai Cecere e Rusia, sa qai kaukaua ga na nodra vakacacani kei na nodra bala e valeniveivesu na tacida. Era vesuka tale ga na vakailesilesi ni matanitu e 131 na vale kei na qele era taukena na iVakadinadina i Jiova, kei na 60 na itikotiko va qori era se vakadikeva tiko me vesu tale ga. Ni cakacakataki vakailavo na veika era vesu qori e sivia toka na $57 na milioni.

Dua vei ira na qele e vesu qori e okati kina na valenivolavola eliu ni tabana e Solnechnoye—e taukena na qele qori na Watch Tower Bible and Tract Society of Pennsylvania. (Raica na iyaloyalo qori ena imawi.) Na isau mada ga ni qele e rauta ni $30 na milioni. Na vo ni 43 na qele era vesu era taukeni tu vakalawa ena veivanua me vakataki Austria, Denmark, Finiladi, Necaladi, Norway, Potukali, Sipeni, Suwiteni, kei Merika. Na kena vakayacori qori e sega ni donu vakalawa ni vakatabuya ga na Mataveilewai Cecere na cakacaka, sega ni kena vesu na qele era taukena tu vakalawa na iVakadinadina i Jiova ena veivanua sa cavuti oti qori.

Era volavola na iVakadinadina i Jiova ina Mataveilewai Cecere ni Dodonu ni Lewenivanua (ECHR) me baleta na kena vesu vakatawadodonu na valenivolavola eliu ni tabana e Rusia. Se mani cava e vakatulewataka na mataveilewai qori, eda nuitaki Jiova vakatabakidua. Meda nanumi ira na tacida mai Rusia ena masu, mera yaloqaqa tiko ga ena kena curumi vakatawadodonu, qai vesu na vanua era sokaloutaki Jiova kina ‘vakayalo, vakaidina tale ga.’—Joni 4:23.