Ena ika24 ni Noveba 2021, e kaya na mataveilewai na Sovetskiy District Court of Lipetsk mai Rusia, ni cala o Brother Viktor Bachurin, Brother Aleksandr Kostrov, kei Brother Artur Netreba. Ratou totogitaki tale ga me ratou sauma yadua e $6,700 na ilavo ni Merika. Ia ni laurai na balavu ni gauna ratou vesu tu kina e valeniveivesu, e kaya na mataveilewai me ratou sauma ga e $4,000 na ilavo ni Merika. Ratou na sega ni biu e valeniveivesu ena gauna qo.

Viktor Bachurin

• Sucu: 1962 (Pavlovsky Posad, Yasayasa o Moscow)

• Me baleti koya: E vakawati, rua na luvena qai dua na makubuna. Vulica na iVolatabu kei ira na iVakadinadina i Jiova ena itekitekivu ni 1990. Papitaiso sara ena 1992. O koya ga ena nona vuvale e iVakadinadina i Jiova

Aleksandr Kostrov

• Sucu: 1961 (Sortavala, Republic of Karelia)

• Me baleti koya: E pailate, e welder, e daunilivaliva tale ga. Rau vakamau kei Larisa ena 1997, qai rua na luvedrau. Sa cegu mai nona cakacaka, e taleitaka na siwa. E marautaka nona bula ni muria na ka e vulica ena iVolatabu. Papitaiso sara ena 2002

Artur Netreba

• Sucu: 1978 (Glodeni, Moldova)

• Me baleti koya: Rau vakamau kei Svetlana ena 1995, qai dua na luvedrau yalewa. Ratou toki vakavuvale i Lipetsk ena vaqara cakacaka. E manidia ena tabana ni volivolitaki. E vakainaki nona bula ni muria na ivakavuvuli vakaivolatabu. Papitaiso sara ena 2000

Ena ika2 ni Tiseba 2019, era curuma vakaukaua na vakailesilesi e vitu na vale ena yasayasa o Lipetsk. Ratou vesu kina o Brother Viktor Bachurin, Brother Aleksandr Kostrov, kei Brother Artur Netreba. Ratou beitaki vei ira na Federal Security Service (FSB) ni ratou cala bibi. Ya ni ratou soqoni tiko qai vakaitavi tale ga ena so na ka vakayalo. Ratou mani vesu vakawawa me 331 na siga.

E vakila o Aleksandr ni sa qai qaqaco ga nona veiwekani kei Jiova ena ituvaki qo. E kaya: “Na veitusaqati va qo, o Jiova ga ena tokoni iko vakalevu.”

Qo na ka e kaya o Artur me cakava: “Au vinakata meu marau, me donu tale ga noqu rai. Au dau tukuna tu ga ni lekaleka wale na ituvaki dredre qo. Se mani vanua cava au tu kina, au se rawa tiko ga ni vosa vua na Kalou o Jiova.”

E kaya o Viktor: “Na ituvaki dredre qo au vakila sara ga ni noqu itokani voleka duadua o Jiova. Dua na ka nona lomani au.”

E vakavinavinakataka o Viktor nodra veitokoni na tacida nira lai vukei watina e sega ni iVakadinadina i Jiova ena gauna e vesu tu kina. E kaya: “E marautaka o watiqu nodra kauaitaki koya eso na tacida yalewa. Qo e dua na ivakadinadina levu vei ratou noqu vuvale ena loloma e laurai vei ira na tamata i Jiova.”

Eda kila ni o Jiova ena vakacegui ira tiko ga na tacida kece mai Rusia, kei na so tale na vanua era sotava tiko na veivakacacani.—Aisea 51:12.