Ena ika10 ni Feperueri 2021, e vakataulewataka na mataveilewai na Abinskiy District Court of the Krasnodar Territory e Rusia, me vitu veimama na yabaki e valeniveivesu o Brother Aleksandr Ivshin e yabaki 63. Qo e itotogi levu duadua me tau vua e dua na iVakadinadina i Jiova me tekivu mai nodra vakatatabutaki ena 2017.

Aleksandr Ivshin

• Sucu: 1957 (Katav-Ivanovsk)

• Me baleti koya: E kenadau ena vakayagataki ni misini lelevu, e dau musu kau, e idinia tale ga. Sa cegu mai na nona cakacaka. Ena 1974, rau vakamau kei Galina. E rua na luvedrau yalewa, e walu tale ga na makubudrau

  E vakasamataka na inaki ni bula ni oti ga nona tauvimate bibi. Ni wilika oti e tolu na Kosipeli, e vulica sara na iVolatabu, qai papitaiso ena 1995

Ena itekitekivu ni 2015, era sa veilewaitaki tiko na iVakadinadina i Jiova e Abinsk. Era beitaki nira vakavuna na “tiko yavavala” era sa vakatabui tale ga. Ena ika23 ni Epereli 2020, a tekivu vaqaqai nona kisi o Brother Aleksandr Ivshin. E beitaki ni cala nona tuvanaka tiko na soqoni, kei na lagati ni noda sere ni soqoni ena internet.

Nodra vaqaqara na vakailesilesi ena nodrau vale na veiwatini e vakavuna me rau tubunidra. A vesu tu me vica vata na vula nona motoka o Aleksandr, ia e nuidei qai mamarau ena ituvaki dredre kece qori. E kaya ena iotioti ni nona vosa ina mataveilewai: “Au sega ni kurabuitaka noqu beitaki ena kisi qo. Ni sa tukuna rawa tu o Jisu ena Maciu 10:18: ‘Dou na qai kau ina matadra na kovana kei na tui ena vukuqu, me ivakadinadina vei ira kei ira tale ga na veimatanitu.’ . . . Au sega ni rarawa ena vosa qo i Jisu. Ia au marautaka vakalevu ni rawa niu tukuna ina mataveilewai na inuinui era na sotava o ira era kauaitaka nodra bula vakayalo.”

Rau wili tale ga o Aleksandr kei Galina kei ira na tacida era yalodina tiko e Rusia, kei na veiyasa i vuravura. Eda nuidei ni rau na vakalougatataki ena vuku ni nodrau nuitaki Jiova.—Jeremaia 17:7.