Ena ika6 ni Epereli 2021, e kaya na mataveilewai na Abinskiy District Court of the Krasnodar Territory mai Rusia, ni cala o Brother Aleksandr Shcherbina qai totogitaki me tolu na yabaki e valeniveivesu. Oti ga na macala ni veilewai qori a biu sara e valeniveivesu. Ena kerea o Aleksandr me rogoci tale nona kisi.

Aleksandr Shcherbina

• Sucu: 1976 (Kholmskaya, yasayasa o Krasnodar)

• Me baleti koya: Rau sa takali na nona itubutubu. E dau draivataka na lori lelevu, e mekeniki, e matai tale ga

• Ni se gone e dau taleitaka na qito basketball kei na soka. Ni yabaki 20 vakacaca, e vulica na iVolatabu kei ira na iVakadinadina i Jiova. Gauna e vulica kina na vakayacori ni parofisai vakaivolatabu, e vakadeitaka sara ga ni iVolatabu e Vosa ni Kalou. Papitaiso ena 1999

Ena Epereli kei na Tiseba 2020, era vaqaqara na ovisa ena yasayasa o Krasnodar ena vale nei Brother Aleksandr Shcherbina. A vakatarogi o Aleksandr e tauri tale ga nona iVolatabu, kei na nona iyaya vakalivaliva.

Ena ika17 ni Maji 2021, a tekivu veilewaitaki kina o Aleksandr ena mataveilewai na Abinskiy District Court. A tosoi vakavica nona veilewai me vakataki ira ga na vo ni tacida era veilewaitaki ena mataveilewai qori.

E kaya ena doudou o Aleksandr ina mataveilewai: “Au beitaki niu vakabauta na Kalou qai dua na iVakadinadina i Jiova. E cala niu vakaraitaka na noqu dodonu e tukuni ena Article 28 of the Constitution of the Russian Federation. Ia na ka au vakabauta e yavutaki ena iVolatabu. Qori e veicalati ke tukuni niu vakavuna na tikoyavavala.”

Eda vakavinavinakataki Jiova nira vakaraitaka tiko ga na tacida mai Rusia, na yaloqaqa kei na vakabauta. Era na vakalougatataki nira cakava tiko “na loma ni Kalou.”—Iperiu 10:36.