Ena ika13 ni Tiseba, 2019 e kaya na Leninsky District Court, e Penza, ni cala o Vladimir Alushkin mani totogitaki qai vesu me ono na yabaki. E vesu na ligana ruarua, qai kau e valeniveivesu. E tautauvata tale ga qori na ka ratou beitaki kina e le lima na tacida, wili kina o Tatyana na wati Vladimir. Ratou sere tu vakawawa na tacida qori (3 na tacida tagane, kei na rua na tacida yalewa), ia ke ratou beca na vakatatabu qori, ratou na ya rua na yabaki e valeniveivesu. Ratou na kerea na tacida me rogoci tale nodratou kisi.

Ena ika15 ni Julai, 2018 e vesu o Vladimir Alushkin, nira curuma vakaukaua nona vale eso na ovisa era vakamatavulo qai vakaiyaragi. E rauta ni va na aua nodra vaqaqara tiko e loma ni vale, era taura na talevoni, iyaya vakalivaliva, iVolatabu, kei na ivola vakaivolatabu. Era vaqaqara tale ga na ovisa ena lima tale nodra vale na iVakadinadina i Jiova, ra qai kauti ira e rauta na le 40 na mataveitacini ena siteseni ni ovisa mera lai vakatarogi.

Era vesuki Brother Alushkin na vakailesilesi me rua na siga, oti e vakarota na Pervomayskiy District Court e Penza, me wawa veilewai tale e valeniveivesu me rua na vula. E tosoya na mataveilewai ni yasana me wawa veilewai tale me va na vula. Ni voleka ni oti e ono na vula nona wawa veilewai, e tokitaki sara me vesu tu e nona vale me yacova nona veilewai ena ika13 ni Tiseba.

Me vakataki Brother Alushkin, ratou beitaki tale ga ni ratou beca na lawa e tolu na tacida tagane o Vladimir Kulyasov, Andrey Magliv, kei Denis Timoshin. Ratou mani vesu tu e vale me ratou vaqaqai qai wawa veilewai. Ena Feperueri, 2019 rau vakatabui tale ga e rua na tacida yalewa o Tatyana Alushkina kei Galiya Olkhova, me rau kua ni veitosoyaki se veivosaki kei ira eso tale.

Ena Okosita, 2019 e tabaka na United Nations Working Group on Arbitrary Detention (WGAD) e dua na ripote e 12 na tabana. E kaya kina ni cala o Rusia nona vesuki qai veilewaitaki o Brother Alushkin. E tomana na WGAD, “e sega ni dodonu me vesu, wawa veilewai, sega tale ga ni dodonu me veilewaitaki” o Brother Alushkin. E kaya na WGAD “na iwali ga ni leqa qori me sere totolo o Mr. Alushkin.” Era yavutaka na loya nodra kudru me baleti ratou na le ono na tacida e Penza, ena ka e vakamacalataka na WGAD e kilai e vuravura raraba. Ia ena ika13 ni Tiseba, e nanuma na mataveilewai ni bibi cake na lewa ni Russia’s 2017 Supreme Court ni vakatauvatani kei na ka e vakatututaki ena WGAD.

Gauna qo era beitaki e le 18 na tacida, e le 9 tale ga era vesu e valeniveivesu ena duidui yabaki. E sivia na le 40 era wawa veilewai tu e valeniveivesu, e le 19 tale ga era vesu tu e vale. E rauta ni le 300 na tacida e Rusia era beitaki nira cala ena vuku ni nodra vakabauta.

Eda rarawataka dina nida rogoca nodra vakararawataki tiko na tacida, ia eda sega ni kurabuitaka. Sa parofisaitaki tu ni na yaco qori, ena veitokoni tale ga o Jiova. Meda kerea mada ga me tiko vei ira na ‘yalo sa lagilagi, io, na yalo ni Kalou me tiko vata kei ira.’—1 Pita 4:12-14.