Ena ika5 ni Noveba 2019, e vakataulewataka na mataveilewai na Oktyabrsky District Court of Tomsk mai Rusia, me ono na yabaki e valeniveivesu o Brother Klimov. O Brother Dennis Christensen duadua ga na tacida e Rusia e va qori na balavu ni nona vesu. Ia e levu na vakatatabu e cakava na mataveilewai vei Brother Klimov. Gauna e vakatabuya kina na Mataveilewai Cecere ena 2017 na noda cakacaka, qo e dua na itotogi warumisa me bau tau.

E vesu o Brother Klimov ena ika3 ni June 2018, nira curuma na ovisa kei na sotia e rua na nodrau vale na tacida. Era qai kau mera lai vakatarogi e rauta ni 30 na tacida, wili kina e dua na tacida yalewa e yabaki 83. Era sere kece mai vakavo ga o Brother Klimov. E beitaki ni daubasulawa, e qai kaya na mataveilewai me wawa veilewai e valeniveivesu me rua na vula. Sa tu rawa e valeniveivesu me 17 na vula, ni se bera mada ga ni tau na kena itotogi me ono na yabaki. Ena loma ni gauna qori, e sega ni sotavi watina kei ratou na nona vuvale.

Era mani kerea nona loya me rogoci tale na nona kisi. Ena ika20 ni Okosita 2018, e ciqoma na mataveilewai na European Court of Human Rights na nona kisi me baleta na nona wawa veilewai.

Ena 2019, levu na tacida e Rusia era vesu, totogitaki, curumi tale ga vakaukaua na nodra vale. Ia era yalodina qai yaloqaqa tiko ga. Eda vakayaloqaqataki vakalevu nida raica na nona vakalougatataki ira na tacida o Jiova nira nuitaki koya vakatabakidua.—Same 56:1-5, 9.