Ena ika22 ni Janueri, 2020, e rogoci kina na vakatulewa me baleti Brother Roman Markin kei Brother Viktor Trofimov. E vinakata na dauveibeitaki me rau ono veimama na yabaki e valeniveivesu.

Ena ika18 ni Epereli, 2018, era curuma na ovisa nodrau vale nira vakamatavulo qai vakaiyaragi ena siti o Polyarny, e Rusia. Era gole ena bogilevu e nona vale o Brother Markin, ra qai basuka na katuba ni vale. Ra vakarerei koya ena dakai, ra qai vakasaurarataki koya me davo ena fuloa nira vaqaqara e nona vale. Ni raica qori na luvena yalewa e yabaki 16, e davo sobu tale ga ena fuloa qai tabonaka na uluna ena ligana.

Era curuma tale ga na ovisa e va nodratou vale na tacida e Polyarny. Era kauti ira e vica vata na tacida mera lai vakatarogi, wili kina o Brother Markin kei Brother Trofimov. E mani vakatulewataka na Mataveilewai ni Yasana e Murmansk me rau wawa veilewai. Rau vesu me ono na vula, oti rau vesu tale ga e vale me va na vula. Ena ika7 ni Feperueri, 2019, rau vakatarai me rau veilakoyaki. Dina ni rau sa sere, ia e vakaiyalayala ga nodrau veitosoyaki kei na veitalanoa me yacova ni tauca na lewa na mataveilewai.

Gauna qo era beitaki tiko e rauta ni 300 na tacida e Rusia. Meda nanumi ira tiko ga ena masu me rawa nira dei, qai yaloqaqa. Eda nuidei tale ga ni sega ni dua na ka ena tawasei ira mai na loloma i Jiova.—Roma 8:38, 39.