Ena ika20 ni Me 2021, e kaya na Leninskiy District Court of Saratov mai Rusia, ni cala o Brother Rustam Seidkuliev. Ena vesu me rua veimama na yabaki. Ni tau oti ga na kena itotogi e kau sara me lai vesu.

Rustam Seidkuliev

• Sucu: 1977 (Ashgabat, Turkmenistan)

• Me baleti koya: Susugi koya o tinana. Vulica na iVolatabu kei ira na iVakadinadina i Jiova ena 1993. A qai papitaiso o tinana ena yabaki e tarava. Ni bera ni papitaiso e vesu vakarua i Turkmenistan, ni sega via curu ena mataivalu ena vuku ni nona vakabauta

  Na vakayacori ni parofisai ena iVolatabu kei na kena ivakavuvuli yaga, e uqeti koya me yalataka nona bula qai papitaiso ena 1998. A vakatalai tani o tamana ni iVakadinadina i Jiova, ratou mani toki vakavuvale i Rusia ena 2000

  Dau vakavinakataka na talevoni, e dau tarataravaki tale ga. Sotavi watina o Yuliya ena 2001. Rau dau taleitaka na viriviri (bowling), vakatakakana kei na qito tenisi (table tennis). Ena Seviteba ni 2019, rau sa qaravi rau tiko na nona itubutubu

Ena Maji 2019, e gole e dua na Federal Security Service (FSB) ena nodrau vale o Brother Rustam Seidkuliev, kei watina o Yuliya. E sogota na nodrau matamata ena nona motoka, e vakatarogi rau, qai vakaroti rau me rau lako ina ofisi ni FSB me rau lai vakatarogi tale kina.

Ena ika15 ni Feperueri 2020, era tarovi Rustam kei Yuliya na vakailesilesi ena dua na vanua ni veivoli. E qai kau o Rustam me lai vesu. E vakataulewataka na mataveilewai me vakatatabutaki. A vesu tu ena dua na vanua e sega ni rawa kina ni raici watina. Ni sa lesu i nona vale, e vakatabui me vakayagataka na internet se me veivosaki kei ira eso tale. A tosoi tale vakavitu nona vakatatabutaki tu i vale. E vakatatabutaki o Rustam me 217 na siga.

Levu na ka dredre e sotava o Rustam ena ituvaki qo. Kena ivakaraitaki, e vakatarai ga vua me taubale ena 9 ina 11 na kaloko ena mataka. Eso na gauna e sega ni vakadonui me samaka nodratou lomanibai, se vakavinakataka na delanivale. Ia e saga me donu tiko ga nona rai, e kaya: “Noqu vakatatabutaki tu, e levu kina na gauna meu masu, qai vakasamataka vakatitobu na veika vakayalo. Niu vakaogai au e veisiga ena veika qori, au sega kina ni lomabibi se rarawa. Eso mada ga na tacida era vesu qai dredre sara na ituvaki era sotava.”

E vakayaloqaqataki Rustam tale ga nona vesu ena imatai ni gauna. Ni vakasamataka lesu nona vesu tu i Turkmenistan, e kaya: “Au vesu niu se itabagone, ia au vakila tu ga e veigauna nona veitokoni o Jiova. Qori e vukei au meu lomavakacegu, qai nuitaki Jiova tiko ga.”

E yalodina tu ga vei Jiova o Rustam. E kaya: “Meda kua ni calata na soqoni se noda ituvatuva vakayalo. Kua ni vakalaiva e dua na ka me vakalatilati ena noda vunau, kei na noda vakayaloqaqataki ira na tacida. Ni sa lekaleka na gauna e vo, au vakadeitaka meu qaravi Jiova tiko ga ena noqu vinaka kece ena vanua cava ga.”

Eda nuidei ni o Jiova ena vakaiyaragitaki ira tiko ga na tacida yalodina mai Rusia, ‘ena ka vinaka kece nira cakava tiko na lomana.’—Iperiu 13:21.