Ena ika23 ni Julai 2021, e sega ni vakadonuya na Novosibirsk Regional Court mai Rusia, nona kerekere Vitaliy. Ena vakatatabutaki tiko ga me tolu veimama na yabaki.

Ena ika21 ni Me 2021, e kaya na Leninskiy District Court of Novosibirsk mai Rusia, ni cala o Brother Vitaliy Popov. Ena vakatatabutaki me tolu na yabaki.

Vitaliy Popov

• Sucu: 1967 (Novosibirsk)

• Me baleti koya: E daunilivaliva, e welder tale ga. Lewena tu mataivalu ni Soviet. Taleitaka na vakasisisi ena dela ni waicevata, soka, volleyball, kei na lagasere. Ratou le va na tacina. Ni se itabagone, rau mate vakaloloma na tacina qase. E lomatarotarotaka kina o Vitaliy e levu na ka me baleta na mate, kei na veigauna se bera mai

  Vulica na iVolatabu kei ira na iVakadinadina i Jiova ena 1990. Vakacegui koya ni kila na vuna eda mate kina. E tarai koya vakalevu na veilomani, veitokoni kei na veivuke era vakaraitaka na mataveitacini. Papitaiso ena 1994, rau vakamau kei Natalya ena 2011

Ena ika27 ni June, 2019, era tekivu vaqaqai Vitaliy na vakailesilesi. Ena ika9 ni Epereli, 2020, era gole na vakailesilesi i nona vale ra qai kauti koya me lai vakatarogi. E vakatarogi tu me sivia ni va na aua.

E beitaki o Vitaliy ni dua vei ira na vakavuna na “tikoyavavala.” E sega kina ni vakadonui me tauri ilavo ena baqe. Oti e rua na vula, e vakacegui mai na nona cakacaka ratou vakila kina na dredre vakailavo.

Ia e tokoni ratou tu ga vakavuvale o Jiova. E kaya o Vitaliy: “E vukei keitou o Jiova me keitou volekati koya tiko ga, e vakarautaka na ka me keitou bula kina, e vakayaloqaqataki keitou tale ga. Keitou vakavinavinakataki Jiova ena nona veivuke. E rawa kina ni donu tiko ga neitou rai qai vosota.”

Qo na ka e kaya o Vitaliy ni vukei koya vakalevu me vosota: “Noqu ituvatuva vakayalo e veisiga, e vaqaqacotaka noqu veiwekani kei Jiova, au volekati koya tale ga. Se mani cava e yaco, e bibi meu nuitaki koya tiko ga.” E okati ena nona ituvatuva vakayalo na sokalou vuvale, tiko ena soqoni qai vakaitavi kina, cakacaka vakavunau kei na nona dau masu mai vu ni lomana. E kaya: “Ke sega noqu ituvatuva, ena sega ni rawa niu nuitaki Jiova qai vosota na ituvaki qo.”

Meda nanumi Vitaliy mada ga ena noda masu, nida waraka tiko na macala ni nona veilewai. Eda kila ni o Jiova ‘e vu ni noda kaukaua,’ ena vakayaloqaqataki ira tiko ga na tacida mai Rusia mera vosota na veivakacacani.—Filipai 4:13.