SEVITEBA 15, 2023
RUSIA

Vesu o Sergey Gromov

SARAVA/ROGOCA

Ena ika14 ni Seviteba 2023, e kaya na mataveilewai na Moskovskiy District Court of Kazan e Rusia, ni cala o Brother Sergey Gromov. E totogitaki tale ga me vesu me ono na yabaki dua na vula. Sa vesu mai ena ika15 ni Maji 2022 ena sega ni sere.

Kena iTukutuku

Sergey Gromov

Sucu: 1969 (Kazan, Republic of Tatarstan)

Me baleti koya: E daudroini (graphic designer)

E vakamau kei Yelena ena 1990. E dua na luvedrau tagane, e dua tale ga na yalewa

Ni se gone e sega ni vakabauta na Kalou, qai dau vaqaqa na itekitekivu ni bula. E mani vulica sara na iVolatabu kei ira na iVakadinadina i Jiova, qai dua na ka nona qoroya ni duavata na iVolatabu kei na veika vakasaenisi. Rau papitaiso vakaveiwatini ena 1995

Ka e Tukuna na Watina o Yelena a

Sala cava drau vakarautaki kemudrau kina vakaveiwatini ena veitusaqati?

Keirau a sega ni lomaleqa ena gauna e tekivu kina na veitusaqati e Rusia ena 2017. Ia keirau biuta ga vei Jiova na neirau icolacola. Keitou muria vakavuvale na veidusimaki mai na isoqosoqo i Jiova, keitou vakadeitaka tale ga me kua ni dua na ka me tarova neitou sokalou. Keitou tomana tiko ga ni qarava neitou itavi, na ituvatuva vakayalo, masu qai vakayaloqaqataki ira na tacida.

E tokoni iko vakacava o Jiova ni vesu tu o watimu?

Tekivu mai na gauna e vesu kina o Sergey sa qai levu ga na gauna au masu kina vei Jiova qai talaucaka kece vua na lomaqu. Au vakila niu volekati koya, e sega tale ga ni vakalaiva meu sotava duadua na ituvaki qo. Eso na gauna au vakila ni dau sauma totolo o Jiova na noqu masu ni dua e vosa vakayalovinaka vei au, mokoti au, se vukei au ena so tale na ka. Au vakila sara ga ni tokoni au o Jiova. Qori e vukei au meu kua ni vakasamataka vakalevu na noqu leqa, ia meu cakava na ka ga au rawata meu vukei ira kina eso tale.

Eda vakavinavinakataka nodrau ivakaraitaki ni yalodina kei na nodrau nuitaki Jiova o Sergey kei Yelena. Na dei ni nodrau vakabauta kei na nona tokoni rau o Jiova eda vakadeitaka kina ni “sega ni lekaleka na liga i Jiova me veivakabulai, se bibi na daligana me dredre ni rogo.”—Aisea 59:1.

Veitaravi ni Gauna

Maji 15, 2022

Tekivu vaqaqai. E mani kau me vakatarogi qai vesu tu vakawawa
Maji 16, 2022

Caka na vaqaqara e nodratou vale
Maji 17, 2022

Biu e valeniveivesu ni waraka tiko nona veilewai
Maji 30, 2023

Tekivu veilewai
Seviteba 14, 2023

Beitaki ni cala qai vesu me ono na yabaki dua na vula

a Ni vakarautaki tiko na ulutaga qo, e sega ni rawa ni tauri nona itukutuku o Brother Gromov ni se vesu tu vakawawa ena gauna qo.

Raica Tale Ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU