E turaga ni Poladi o Andrzej Oniszczuk. Ena ika9 ni Okotova, 2018 era vesuki koya na ovisa qai wawa veilewai tiko e Rusia. Sa tosoi vakalima nona wawa veilewai tiko. E toso tale qo ena icavacava ni ika2 ni Okotova, vo ga e vica na siga me yabaki dua kina nona waraka tiko me veilewai.

E tiko duadua voli ga ena gauna kece e vesu tu kina. Sega ni vakatarai me davo ena 6 na kaloko ena mataka lailai, me yacova na 9 na kaloko ena bogi. Ena sili waikatakata ga vakadua e veimacawa me 15 na miniti. E sega ni vakatarai me sikovi koya o Anna na watina ena tini na vula e vesu tiko kina qori. Rau rawa ga ni veivolavolai. E kerea vakavica me sikovi Andrzej, ia e sega ni vakadonui.

Me vaka sa vakamacalataki oti, e vesu o Andrzej ni oti nodra curuma vakaukaua na ovisa era vakamatavulo na nona vale, kei na nodra vale na le 18 tale era tiko e Kirov. E beitaki ni basulawa ena nona lagata tiko na sere ni Matanitu ni Kalou, kei na nona vulica tiko na ivola vakaivolatabu.

Ratou vesu ena yabaki sa oti o Andrzej kei na le va tale na tacida e Kirov, (o Maksim Khalturin, yabaki 44, o Vladimir Korobeynikov, e yabaki 66, o Andrey Suvorkov, e yabaki 26 kei Evgeniy Suvorkov e yabaki 41) ratou se wawa veilewai kece tiko qo. E vakatabui me ratou biuta nodratou vale. Na nodratou kisi ni veilewai kece ena rogoci ena mataveilewai me baleta nodra dodonu na lewenivanua e Urope (ECHR).

Ena yabaki tiko ga qo ratou beitaki tale ga ni ratou basulawa e vitu na tacida mai Kirov, e qase duadua o Yevgeniy Udintsev, e yabaki 70. Era le 12 kece na tacida e Kirov era beitaki tiko nira basulawa ena vuku ga ni nodra sokalou.

Me vakataki Andrzej, Anna, kei ira na vo ni tacida e Rusia, meda nanuma dei tiko ga na vosa uqeti vakalou qo: “Ni dau nanumi ira na tu e valeniveivesu me vaka sara ga oni vesu tu kei ira, ni nanumi ira tale ga na vakacacani, ni oni se bula tiko e vuravura.”—Iperiu 13:3.