Ena vakarau vakataulewataka na mataveilewai na Leninskiy District Court of Rostov-on-Don mai Rusia, na kisi me baleti Sister Lyudmila Ponomarenko, e yabaki vitusagavulu kadua. a

Lyudmila Ponomarenko

• Sucu: 1950 (Ola, Yasayasa o Magadan)

• Me baleti koya: A daunilivaliva tu ni bera ni cegu mai na nona cakacaka. Rua na luvena yalewa, e rua tale ga na makubuna. Taleitaka na wilivola, kei na talitali (crochet). E dau qaravi watina e tauvimate bibi

• E marautaka vakalevu nona mai kila na yaca ni Dauveibuli. E tarai koya tale ga na inaki ni Kalou me baleta na vuravura kei na kawatamata. Papitaiso me iVakadinadina i Jiova ena 1998

Ena ika6 ni June 2019, a beitaki o Sister Lyudmila Ponomarenko ni daubasulawa. E beitaki ni vakavuna na “tikoyavavala,” ni dau caka e nona vale na soqoni, kei na nona dau wasea na itukutuku ena iVolatabu.

Sa namaka tu o Lyudmila me na vakacacani me vakataki ira ga eso tale na mataveitacini mai Rusia. E kaya: “Gauna era vakacacani kina na tacida era tiko e Moscow kei na siti o Taganrog, au sa kila tu ga ni keimami na vakacacani kece.”

Ena vuku ni vakatatabu ni COVID-19, e sega ni rawa kina vei ira na mataveitacini mera lai vakayaloqaqataki koya ena vanua ni veilewai. E kaya kina o Lyudmila: “Dua na ka noqu lomaleqa niu gole duadua ena veilewai. Au sa qai saga meu lagata lo na sere ni soqoni, qai masuti Jiova niu gole ina veilewai. Qori e vakaukauataki au, au sega ni rere qai vaka me totolo ga na veilewai.”

E vakamacalataka tale ga o Lyudmila na ka e vakila o watina kei rau na luvena yalewa ratou sega ni iVakadinadina i Jiova. E kaya: “Ratou sega ni taura rawa na vuna au veilewaitaki kina. Dua na ka nodratou kauai niu sa mai tauvimate vakalevu ena ituvaki dredre qo. Ia toso na gauna sa qai matata vei ratou na kequ ituvaki, na nodratou veitokoni tale ga e vukei au meu vosota.”

E sega ni vakayalolailaitaki Lyudmila na veika e sotava. E kaya: “Au sega ni lomaleqataka na ka au sotava tiko qo, kei na veika ena vakarau yaco me vaka e parofisaitaki tu ena iVolatabu. Qori e vakamarautaki au vakalevu. Sa qai qaqaco ga noqu veiwekani kei Jiova. E vakaibalebale noqu masu, qai vu mai lomaqu.”

Eda kila ni na tokoni Sister Ponomarenko na yalo tabu i Jiova, ena vakalougatataki koya tale ga ni vakararavi tiko “ena ruku ni yaloyalo i koya e Kaukaua Duadua.”—Same 91:1.