Ena ika25 ni Okotova 2021, e vakataulewataka na mataveilewai na Pavlovo City Court of the Nizhny Novgorod Region mai Rusia, ni cala o Brother Oreshkov, Brother Rakovskiy, kei Brother Vavilov. Ratou na vakatatabutaki me tolu na yabaki.

Aleksey Oreshkov

• Sucu: 1971 (Pavlovo, Yasaysa o Nizhny Novgorod)

• Me baleti koya: Ni se gone, e dau taleitaka na qito table tennis. E tauri vola mai na univesiti ni ivakatagi, qai kenadau ena iyaya ni ivakatagi uvuci. Sa cegu mai na nona cakacaka. Vica vata na yabaki nona qaravi tinana itabaqase tu. Papitaiso me iVakadinadina i Jiova ena 2011

Aleksandr Rakovskiy

• Sucu: 1980 (Pavlovo, Yasayasa o Nizhny Novgorod)

• Me baleti koya: Ni se itabagone, e vulica na qiri qita, qai lewena tu e dua na mataqiriqiri. E kenadau ena tabana ni internet. Rau vakamau kei Tatyana ena 2005. E uqeti rau na inuinui ena gauna se bera me rau vulica na iVolatabu kei ira na iVakadinadina i Jiova. Papitaiso ena 2009. Dua na luvedrau tagane, dua tale e yalewa

Aleksandr Vavilov

• Sucu: 1967 (Kropotkin, Yasayasa o Krasnoda)

• Me baleti koya: Ni se itabagone e dau taleitaka na qalo, cici, vakasisisi ena waicevata kei na droini. A lewena tu na mataivalu. Toso na gauna e vulica me dau veivacu saumi, e qai kila ni cala me vakaitavi ena qito voravora qori. Oti e dauveikoti sara. Rau vulica vakaveiwatini na iVolatabu kei ira na iVakadinadina i Jiova. Rau vakamau ena 1994, qai papitaiso ena 1995. Rau taleitaka me rau cakava vata eso na ka i tuba

Ena ika16 kei na ika17 ni Julai 2019, era curuma vakaukaua na ovisa na Federal Security Service (FSB) nodra vale na tacida ena yasayasa o Nizhny Novgorod. Rau mani vakatarogi o Aleksey Oreshkov kei Aleksandr Vavilov, qai vesu tu vakawawa. E vesu o Aleksey me 211 na siga, qai vakatatabutaki i vale me 31 na siga. O Aleksandr a vesu me 241 na siga.

Dua na ka nona dau masu vagumatua o Aleksey ena gauna e vesu tu kina. Ena masulaka e veisiga me donu tiko ga nona rai ena veika dredre e sotava, me yalodina tiko ga qai vakasamataki Jiova kei na nona vosa. E kaya: “Toso na gauna, au sa qai masu ga vakalevu qai vakaibalebale na noqu masu. Au dau saga meu cavuta yadua na yacadra na tacida. Au masulaki ira tale ga na cakacaka tu e valeniveivesu, ira keimami vesu vata, ira na dauveivaqaqai, noqu vuvale, na ivavakoso kei na isoqosoqo.”

E kaya o Aleksandr Vavilov: “Sa qai volekati au ga o Jiova. Au vakila ni taura tiko na ligaqu me vaka ga nona kauaitaka e dua na luvenisipi na kena ivakatawa. Au vakadinadinataka nona veitaqomaki o Jiova, kei na nona karoni au tu ga e veisiga.”

Ena ika21 ni Seviteba 2020, e beitaki ni cala o Aleksandr Rakovskiy, qai veilewaitaki kei Brother Oreshkov kei Brother Vavilov. Ratou beitaki ni ratou basulawa, me vaka nodratou vakaitavi ena soqoni. Ratou vakatabui me ratou lako ena dua tale na vanua.

E vakayaloqaqataki Aleksandr Rakovskiy nona vakasamataka vakatitobu na parofisai vakaivolatabu, vakabibi na tui ni vualiku. E kaya: “Niu vakasamataka na kena yaco tiko nikua na parofisai ni noda tusaqati, e uqeti au meu kua ni yalolailai. E dei tu ga vei au na nona yalayala o Jiova ni na tokoni keda nida sotava na ituvaki dredre.”

Eda nuidei ni na donu tiko ga nodratou rai na tacida qo. Na dei ni nodratou vakabauta e vukei ratou me ratou vosota na ituvaki dredre.—Filipai 1:29.