A sere mai o Brother Konstantin Bazhenov ena valeniveivesu mai Rusia ena ika5 ni Me, 2021. a Ni oti nona vesu tu vakalekaleka, e vakatalai lesu i Ukraine ena ika19 ni Me, 2021. Sa liu na watina o Irina me lai tavaki koya mai kea. E caka qori ni sa sega ni vakadonui o Konstantin me lewenivanua e Rusia ena Me, 2020.

A sucu o Konstantin ena 1975, qai susugi ena vuvale e sega ni lotu ena yasayasa vakara kei Rusia, ena siti o Veliky Novgorod. Ni se gone, ratou toki vakavuvale i Ukraine. Ni sa itabagone e vulica na soli ivukivuki (gymnastic), qai dau taleitaka na ivakatagi. E tauri ivola ena dua na koronivuli ni ivakatagi qai liuliu sara ni dua na mataqiriqiri.

Ni se bera ni vulica na iVolatabu, e vakabauta ni cala na itovo kaukaua kei na ivalu. E sega gona ni vakadonuya me curu ena mataivalu e Ukraine ena gauna e digitaki kina. Ni se vuli tiko ena Univesiti, e dau lomatarotarotaka na veika me baleta na bula kei na lotu. E lai vaqara isaunitaro ena levu na veimatalotu, ia e qai kunea na kena isau ni vulica na iVolatabu kei ira na iVakadinadina i Jiova. E papitaiso sara ena 1996.

Rau vakamau kei Irina ena 2001. E dau tuva buloko, e kenadau ena caka ovani kei na matadravu me tokoni rau kina vakaweitini. Rau toki i Rusia ena 2009.

Ena ika 12, ni June 2018, era curuma vakaukaua e vitu nodra vale na tacida mai Saratov na ovisa era vakayaragi tu, wili kina na nodrau vale o Konstantin kei Irina. E mani vesu kei na rua tale na tacida tagane e Saratov qai wawa veilewai.

Gauna e yaco yani kina o Konstantin ena vanua me vesu kina, e kila ni na vukei koya qai vakacegui koya na Vosa ni Kalou. Ia e sega ni soli vua na iVolatabu, e kaya o Konstantin: “E vakauta mai au o watiqu e dua na ivola, au qai dau vola kina e veisiga na tikinivolatabu kece au vakasamataka rawa.” Ena loma ga ni rua na vula, e vukei koya o Jiova me vakasamataka rawa e 500 na tikinivolatabu! Gauna sa dua kina na nona iVolatabu, e wilika taucoko ena loma ga ni va na vula. Qori e vakayaloqaqataki koya dina. E dau vakamarautaki koya tale ga na nona ivola vei watina kei ira na nona itokani eso na veitikina bibi e wilika ena iVolatabu.

E masuti Jiova vakawasoma o Konstantin me rawa ni vukei koya ena nona vesu, vakabibi ni tu taudua, qai yawa mai vei watina. E kaya: “Au dau tekiduru qai tagi vei Jiova niu masu. Au mani nanuma, meu vola ena dua tikinipepa na veika kece au kerea vei Jiova. Au qai bokoca na kena e sa sauma mai. Au vakadeitaka sara ga ni volekati au o Jiova.” Ena ika20 ni Me 2019, e sere mai o Brother Konstantin. Ia eso tale na veika dredre e qai sotava.

Ena ika19 ni Seviteba, 2019, e vakataulewataka na mataveilewai ni ratou cala o Brother Konstantin kei na lima tale na tacida tagane, ratou qai bala e valeniveivesu. Ni oti e vica na vula, e sega ni vakadonui na nodratou kerekere, ratou qai kau ina valeniveivesu e Orenburg. E kau o Konstantin ina valeniveivesu e Dimitrovgrad, e sivia na 500 na kilomita na kena yawa mai Saratov, na vanua rau tiko kina vakaveiwatini.

Dina ni rau tu veiyawaki, ia e dau vakayaloqaqataki Irina na nona wilika na irogo ena noda website ena kedra itukutuku na tacida era vosota tiko ga ena marau na nodra vakacacani. E vakayaloqaqataki koya tale ga na nona dei qai lomavakacegu tu ga o Konstantin. Ni vakatarogi o Irina ena gauna e vesu tu kina o Konstantin, e kaya: “E dau donu tu ga na nona rai. Gauna e vakadonui kina meu qiriti koya keirau rau dau lagasere, masu qai vuli vata.” E kaya ni vaqaqacotaka nona veiwekani kei Jiova na nodrau dau veivosakitaka na iVolatabu. E vukei koya tale ga me marau, dina ni sotava tiko na ituvaki dredre.

E vesu tu vakawawa o Konstantin me sivia e 14 na vula. Oti qori sa qai vesu ena vuku ni nona vakabauta, me sivia e dua veimama na yabaki. E sere koso ni vo e ciwa na vula me vakaotia kina na kena itotogi. E caka qori ni wiliki tale ga na balavu ni gauna a wawa veilewai tu kina e valeniveivesu. E vakalailaitaki tale ga me rua na vula na kena itotogi ni sa mai vakatatabutaki ga e vale.

Eda marau ni sa sere o Konstantin, qai lesu i vale vei watina o Irina. O ira kece na tacida era vosota tiko na veivakacacani, era muria na ka e tukuna o Tui Tevita: “Au mai vakaruru ena ruku ni tabamuni me yacova ni oti na leqa.”—Same 57:1.