JULAI 25, 2023
RUSIA

Yaga Vakalevu na Masu kei na Rai Donu

SARAVA/ROGOCA

Ena vakarau tauca na mataveilewai na Pervorechenskiy District Court of Vladivostok e Rusia na lewa me baleti Sister Nina Astvatsaturova, Sister Yelena Barmakina, Sister Ludviga Katanaeva, Sister Yekaterina Treguba, Sister Yelena Tsorn, Brother Igor Lonchakov kei Brother Yuriy Redozubov. E se bera ni kerea na dauveibeitaki na kedratou itotogi.

Kedratou iTukutuku

Igor Lonchakov

Sucu: 1977 (Saratov, Saratov Region)

Me baleti koya: Cakacaka ena tabana ni vakauitukutuku ena positovesi

E mai iVakadinadina i Jiova o tinana ni se vuli tiko ena sekeneri o Igor. E uqeti koya me vulica na iVolatabu nona raica na mamarau i tinana. Papitaiso ena 2008

Ka e Tukuna

Na tikinivolatabu cava e uqeti iko?

E sega ni rawarawa na ituvaki niu veilewaitaki. E tara na noqu bula vakayago, na ivakarau ni noqu vakasama, au vakila tale ga na dredre vakailavo. Au lai diva kina na veigauna sa oti. Au masulaka qori vei Jiova. Au mani vakasamataka vakatitobu na ka e kaya na Dauvunau 7:10, e kaya: “Mo kua ni kaya, “Na cava e vinaka kina na gauna sa oti mai na gauna qo?” ni sega ni vukutaki mo taroga qo.” E vukei au na tikinivolatabu qori meu vakananuma na sala au vakalougatataki kina. E tokoni au o tinaqu, na tagane keirau veimusumusuki kei ira na mataveitacini ena ivavakoso. Koya e bibi duadua, au kila ni tu e yasaqu o Jiova. Niu masu ena gauna qo, au sa sega ni tukuna tu ga na ituvaki dredre au sotava, ia au dau vakavinavinakataka kece na nona vakalougatataki au o Jiova.

Yuriy Redozubov

Sucu: 1972 (Komsomolsk-on-Amur, Yasayasa o Khabarovsk)

Me baleti koya: E tekivu vulica na droini ni se gone. E lai qasenivuli sara ni tabana ni droini

Rau vakamau kei Anastasiya ena 1998. E tolu na luvedrau yalewa

Rau tekivu wilika vata na iVolatabu. Rau sotavi ira na iVakadinadina i Jiova qai marautaka ni saumi na nodrau taro mai na iVolatabu. Papitaiso o Anastasiya ena 2003, e papitaiso o Yuriy ena 2004

Ka e Tukuna

E vukei iko vakacava na masu mo vosota?

Me tekivu noqu tusaqati, au vakamatatataka sara ga na noqu masu vei Jiova. Au vakadeitaka tale ga me kua ni dua na ka me tarova na noqu masu. Au dau kerei Jiova me vukei au meu kua ni rere. Qori e vukei keitou vakavuvale me keitou kua ni yalolailai se lomaleqa. Au kila tale ga ni dua na itavi dokai meu tusaqati ena vukui Jiova. Sa qai dei ga noqu veiwekani kei koya.

Yekaterina Treguba

Sucu: 1991 (Vladivostok, Yasayasa o Primorye)

Me baleti koya: Qasenivuli ni vosa vakavalagi

Ni se gone, e dau wilika vua o nona bu na ivola Noqu i Vola ni Talanoa ena i Vola Tabu. Ni yabaki 15, e tekivu vulica na iVolatabu. Papitaiso ena 2008

Ka e Tukuna

Cava o vulica ena ituvaki dredre qo?

E dredre sara ga meu marau tiko ga. Niu wilika na kedra italanoa na tacida era vesu, au vulica ni levu ga ni ituvaki dredre era sotava, na levu tale ga ni marau era vakila. Ia au sega ni raica rawa na vuna meu marau kina. E vukei au noqu vakasamataka vakatitobu na qaqa ni sere 111, e kena ulutaga “Vu ni Noda Marau.” E kaya e dua na qaqana: “Qo yavu dei ni noda marau,/ Vu mai na Vosa ni Kalou.” Au liaca ni dodonu meu vakani au vakalevu mai na Vosa ni Kalou, meu kerea vakalevu ena masu meu marau. Qori sara ga na ka au cakava tiko ena gauna qo.

E veivakacegui nida kila ni o Jiova ena vakalougatataki ira qai vakacegu ira nona dauveiqaravi, ni ‘viribaiti ira ena nona veivakadonui.’—Same 5:12.

Veitaravi ni Gauna

Okosita 6, 2019

Beitaki ena basulawa o Yelena Barmakina
June 8, 2020

Tekivu beitaki ena basulawa o Nina, Ludviga, kei Yelena Tsorn
June 17, 2020

Tekivu veilewaitaki o Yelena Barmakina
Julai 9, 2020

Caka na vaqaqara ena nona vale o Nina, Ludviga, Yelena Tsorn, kei Yuriy. Kau mei lai vakatarogi o Yuriy. Ratou vakatabui o Nina, Ludviga, kei Yelena Tsorn me ratou gole ina dua tale na vanua
Seviteba 4, 2020

Beitaki ena basulawa o Igor
Seviteba 8, 2020

Beitaki ena basulawa o Yekaterina
Seviteba 29, 2020

Kau lesu na nona kisi o Yelena Barmakina vei ratou na dauveibeitaki. E sega ni levu na ivakadinadina ni vakavuna na tiko yavavala
Okosita 11, 2021

Beitaki ena basulawa o Yuriy. Tekivu tale na nona kisi o Yelena Barmakina. Ratou sa na veilewaitaki kece ena dua ga na kisi
Seviteba 28, 2022

Tekivu na veilewai

a b Rau sega ni rawa ni vakatarogi o Sister Astvatsaturova kei Sister Katanaeva.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU