Albert Batchaev

• Sucu: 1976 (Karachayevsk)

• Me baleti koya: E va na tacina. Sa takali o tinana, qai qaravi tamana itabaqase tiko. E vuli loya ni mataivalu mani cakacaka ena tabana ni veivaqaqai

  E vulica na iVolatabu qai vakadeitaka ni dina na ka e tukuni kina. Ena 2004, e papitaiso me iVakadinadina i Jiova qai vakamautaki Zhanna ena 2007. Gauna qo, e dau caka katuba ni vale. Ia ni tautauvimate, sa yalani ga na ka e rawa ni cakava. Rau dau taleitaka vakaveiwatini na draiva, taubale ina veiulunivanua se me rau cakava eso na ka i tuba

Ena ika16 ni Tiseba 2019, era vaqaqara na ivakalesilesi ni Federal Security Service, ena tini vakacaca na vale ena siti o Cherkessk. Era mani vesu kina e levu na tacida.

Ena siga tarava, era sereki kece na tacida vakavo ga o Brother Albert Batchaev. E vesu tu vakawawa me 72 na aua, qai beitaki ni tuvanaka tiko na nodra lagasere kei na nodra masu vei Jiova. Oti nona beitaki, era tekivu vaqaqai ira na nona itokani na ivakalesilesi.

E kaya: “Dua na ka na noqu rere ena gauna au vesu kina, vakabibi niu rogoca ni sa sogo qai loka na katuba. Au nanuma niu na sega vakadua ni sere, au sa na mate ga i kea. Au lomaleqataka tale ga vakalevu na ka ena yacovi watiqu, kei ira na mataveitacini.”

E vesu tu o Albert me rua na vula, oti e mai vakatatabutaki i vale. Oti ga e dua na macawa, e baci vesu tale me vitu na macawa. E kaya: “Niu tu taudua i valeniveivesu, au sa qai raica na bibi ni noda ituvatuva vakayalo, meda qai ogaoga tiko ga ena veika e vauca na Matanitu ni Kalou. Qori e vaqaqacotaka noqu vakabauta, meu vosota, dei noqu inuinui, meu qai lomani Jiova vakalevu kei ira na taciqu.”

E dredre me laurai na iVolatabu e valeniveivesu, ia a qai soli vei Albert e dua na iVolatabu. E kaya: “Na iVolatabu sara ga e vukei au meu vosota, au sega ni yalolailai se nanumi ira vakasivia na wekaqu kei ira noqu itokani. Au sa qai taura rawa na veika era vakila na cavuti ena iVolatabu. Dina nira tusaqati vakaukaua qai biu tale ga e valeniveivesu, ia era yalodina tiko ga. Au dau wilika tu ga na kedra italanoa ena iVolatabu, ia niu biu i valeniveivesu, au raici ira sara ga mera noqu itokani. Sa levu gona na noqu itokani ena gauna makawa kei na gauna qo.”

Ena Epereli 2020, e lewa na mataveilewai me vakatatabutaki i vale o Albert me rua na vula. Sa vakabalavutaki vakava na itotogi qori. E tau na iotioti ni kena itotogi ena vula o Maji, e dodonu me sere ena icavacava ni vula o June 2021.

Eda kila ni o Jiova ena vakayaloqaqataki Brother Batchaev, kei ira na tacida era veilewaitaki tiko. Ena tokoni ira tale ga.—1 Veigauna 29:12.