Ena ika9 ni Seviteba 2021, e vakataulewataka na Birobidzhan District Court of the Jewish Autonomous Region mai Rusia, ni cala o Brother Andrey Gubin. Ena vakatatabutaki me rua veimama na yabaki, ia ena sega ni biu e valeniveivesu ena gauna qo.

Andrey Gubin

• Sucu: 1974 (Siti o Saran, Kazakhstan)

• Me baleti koya: Ratou le tolu na veitacini, o koya na itini duadua. Ni se itabagone, e dau vuli cakacaka ni suka na vuli ena vanua ni caka loka me tokona nona vuvale. Oti e cakacaka sara ena vanua ni musu kaukamea (lathe), e draivataka tale ga na lori lelevu. E taleitaka na qito, vola serekali kei na iyaya ni vakatagi

• Ni se gone, e dau rarawataka na veika tawadodonu kei na veika ca e yaco tiko e vuravura. Ia e lomavakacegu qai vakainaki nona bula ni vulica na iVolatabu. E yalataka nona bula vua na Kalou o Jiova, ni uqeti koya na yalayala ena iVolatabu ni na oti na veika tawadodonu, kei na veika ca e vakila tu na kawatamata. E papitaiso ena 1991 ni se qai yabaki 17. Rau vakamau kei Tatyana ena 2007. Toki i Birobidzhan ena 2011

Ena ika12 ni Feperueri 2020, era vaqaqai Brother Andrey Gubin na tabana ni Federal Security Service (FSB). E qai veilewaitaki ena ika17 ni Seviteba 2020.

E 18 tale na kisi era beitaki kina na mataveitacini ena Jewish Autonomous Region. Era veilewaitaki ni oti nodra curuma vakaukaua na ovisa na nodra vale ena dua na sasaga e vakatokai me “Siga ni Lewa.” Ena ika17 ni Me 2018, era vaqaqara e 150 na ovisa ena nodra vale e 22 na tacida. Era taura na nodra kad ni baqe, na ilavo, itaba, kompiuta, kei na so tale na iyaya vakalivaliva.

Era sogota na vakailesilesi na nodrau akaude ni baqe o Andrey kei Tatyana. Rau vakila kina na dredre ni bula vakailavo. Na balavu ni veilewai e lai tautauvimate kina o Tatyana. Ia e vakacegui rau nodrau wilika wasoma na iVolatabu. E yaga vakalevu vei rau na ivakasala ena iVolatabu me rau vosota rawa kina na veika dredre.

Na nodra veitokoni na mataveitacini e uqeti Andrey me nuitaki Jiova, kei na nona isoqosoqo. Kena ivakaraitaki, dua na gauna e leqataka vakalevu o Andrey na kena ituvaki. E mani tukuna vua na tacida tagane a beitaki tale ga. E qai vakadeitaka na tacida qori vua ni sega ni cala ke da leqataka eso na ka. E vakananuma tale vei Andrey ni o Jisu e dau raica me ka dokai nona vakacacani ena vuku ni yaca i Jiova. E kaya o Andrey: “Au sa qai lomavakacegu. Au vakadeitaka meu cakava tiko ga na loma i Jiova.”

Meda masulaka ni rau na nuitaka tiko ga o Andrey kei Tatyana, na veivakacegui kei na veivakayaloqaqataki ni Vosa ni Kalou, kei ira na mataveitacini. Eda nuidei “ni na vinaka sara nodra bula o ira era doka na Kalou dina.”—Dauvunau 8:12.