Ena ika31 ni Me 2021, e vakataulewataka na Gornomariyskiy District Court of the Republic of Mari El mai Rusia, ni cala o Sister Yekaterina Pegasheva. Ena vakatatabutaki me ono veimama na yabaki.

Yekaterina Pegasheva

• Sucu: 1989 (Gaintsy, Yasayasa o Kirov)

• Me baleti koya: E le dua ga. Taleitaka na wilivola, vola serekali kei na lagasere. E dausasamaki. E vulica na vosa vakaMari me vunau kina vei ira e levu

Ena ika3 ni Okotova 2019, a vesu o Sister Pegasheva ena siti o Yoshkar-Ola na koroturaga kei Mari El. Era vaqaqara na ovisa ena nona vale ra qai kauta na ivola, iyaya vakalivaliva, ivola e vakau vua, kei na so tale na ka vakaivola. E beitaki o Yekaterina ni tokona na isoqosoqo e vakatatabutaki tu. Ena sala cava? Ni veivosakitaka tiko na iVolatabu kei ira eso tale era vakabauta vata.

E kaya o Yekaterina: “E vakasauri ga nodra cicivi au yani i gaunisala na ovisa, era vakaravici au ina dua na vunikau ra qai vesuka na ligaqu. Me vakataki Niemaia, e totolo ga noqu masu meu kerea na veivukei i Jiova.” Oti e vesu qai wawa veilewai tu i loma me sivia e 100 na siga. Gauna qo e vakatatabutaki tu i vale.

E vakavica vata nona vakatarogi o Yekaterina ena gauna e wawa veilewai tiko kina. E vakadinata ni yaga vakalevu vua na veika e vulica ena iVolatabu. E kaya: “Au nanuma lesu na ivunau au rogoca, kei na itavi au lesi kina ena Koronivuli ni iTalatala ni Matanitu. Qo e dua na tikina e vakayaloqaqataki au vakalevu: Ni o vakatarogi vei ira na meca, o sa duri tale tu ga ena mata ni Turaga o Jisu. Qori e vukei au meu lewai au vinaka qai dokai ira tiko ga na vakailesilesi era beitaki au vakailasu.”

E sega ni rawarawa vei Yekaterina nona vesu, qai vakatatabutaki tu me sivia e dua na yabaki. Sa lai tautauvimate kina, sega ni rawa tale ga ni cakacaka saumi. E sega ni rawarawa vua ni sa yawaki tinana tu kei nona Bu. E vakadeitaka o Yekaterina me yalodina tiko ga ni vakatovolei. E kaya: “Na levu ga ni nodra tusaqati au, na levu tale ga ni noqu daramaka na iyaragi vakayalo. Gauna qo, au sa sega ni rerevaka e dua na ka! Au dau yaloqaqa, ia qo ena veivuke ni yalo tabu ni Kalou au sa qai yaloqaqa ga vakalevu.”

Ni waraka tiko o Yekaterina na macala ni nona veilewai, eda kila ni na nuitaki Jiova tiko ga, e dau vakaukauataki ira na nona dauveiqaravi.—Lako Yani 15:2.