Irina Lokhvitskaya

• Sucu: 1962 (Izvestkovoye, Jewish Autonomous Region)

• Me baleti koya: Ni se qai yabaki ono, sa takali o tamana. Dau vakaitavi ena danisi, drama, talitali, qito basketball kei na volleyball ena gauna se gone kina

  E uqeti koya vakalevu na inuinui ni veivakaturi ena iVolatabu. E papitaiso me iVakadinadina i Jiova ena 1993. Oti ga e vitu na vula nona papitaiso e takali o watina, mani susugi luvedrau duadua tu o Artur e se qai yabaki vitu

Ena ika6 ni Feperueri 2020, era beitaki Sister Irina Lokhvitskaya kei na lima na tacida yalewa na vakailesilesi mai Birobidzhan, ni ratou vakavuna na “tikoyavavala.” Era veilewaitaki e 22 na iVakadinadina i Jiova ena vanua qori ena 19 na kisi. E wili kina na luvei Irina, o Artur kei na watina o Anna.

Era vakatabui na lewenivanua, tabana ni itukutuku, kei na weka mera mai rogoca na kisi nei Irina. E sega ni vakadonui nona kerekere mera mai rogoca eso tale na nona kisi, se me dikevi tale na ka e beitaki kina.

Na ituvaki dredre e sotava tiko o Irina e vakavuna me tauvimate, qai yalolailai. Ia e vosota rawa ni dei tiko ena nona ituvatuva vakayalo. E kaya: “E vukei au o Jiova meu dei ena dua na ituvatuva vinaka. Meu kua ni wilika wale tu ga na iVolatabu, ia meu dau vakekeli tale ga.” Eso na gauna na yalolailai e dau vakaleqa nona ituvatuva vakayalo, ia e dau kerea na veivuke i Jiova. E kaya: “Au masuti Jiova sara ga mai vu ni lomaqu, qai muria tale na noqu ituvatuva. E vakavulici au o Jiova meu kua ni nanumi au ga, ia meu dau nanumi ira vakalevu eso tale.”

E saga o Irina me dau kauaitaki ira na yalolailai vakalevu. Me vakataki ira na tataleitaki kei ira na mataveitacini. E kaya: “Ni o kauaitaki ira eso tale, o na sega ni vakalomalomani iko se lomaleqa vakalevu.”

Era vakayaloqaqataki Irina tale ga na lewe ni nona ivavakoso, vakabibi o ira na qase ni vavakoso. E kaya: “Dina nira sotava tu na veivakacacani ia era dau vakacegui au, e dau veivakayaloqaqataki na ka ratou tukuna. Ratou dau tokoni ena gauna au vinakata kina na veivuke, qori e dua na ka au marautaka.”

Ni sotava tiko o Irina na ituvaki dredre qo, eda nuidei ni na vukei koya tiko ga o Jiova. E kaya: “Niu dau wilika na kedra italanoa na vakacacani, au dau vakasamataka na ka meu cakava niu sotava na ituvaki ya. Vakacava au na nuitaki Jiova? Qo au sa qai kila ni o Jiova ga ena vukei au meu vosota. Me vakai ira ga nona dauveiqaravi yalodina, au na tudei ni taura tiko ga o Jiova na ligaqu imatau.”—Aisea 41:10.