7 JULAI, 2022
RUSIA

Yalodina tu ga o Yevgeniy me Vakai Ratou Nona Lewenivuvale

SARAVA/ROGOCA

Ena ika27 ni June 2022, e totogitaki Brother Yevgeniy Zinich na mataveilewai na Oktyabrskiy District Court of Krasnoyarsk mai Rusia, me ono na yabaki e valeniveivesu. Ni tau oti ga na lewa sa vesu sara.

Veitaravi ni Gauna

11 Tiseba, 2020

Caka na vaqaqara e nona vale
21 Janueri, 2021

Tekivu vaqaqai
19 Okotova, 2021

Beitaki ni tuvanaka tiko na cakacaka ni isoqosoqo e vakavuna na tikoyavavala
20 Okotova, 2021

Vakatabui me gole ena dua tale na vanua
14 Tiseba, 2021

Tekivu veilewaitaki

Kena iTukutuku

Yevgeniy Zinich

Sucu: 1966 (Nazarovo, Yasayasa o Krasnoyarsk)

Me baleti koya: Ratou tusaqati ena vuku ni nodratou vakabauta na nona itubutubu, kei rau na tubuna ena veiliutaki ni matanitu makawa kei Rusia

Papitaiso me iVakadinadina i Jiova ena 1982. Rau vakamau kei Mariya ena 1988, qai dua na luvedrau yalewa. E takali o Mariya ni bera ni oti nona veilewaitaki

Ka e Tukuna

Ratou tusaqati ena vuku ni nodratou vakabauta na nomu itubutubu kei rau na tubumu, wili kina o rau na itubutubu nei watimu. E vukei iko vakacava na nodratou ivakaraitaki?

Gauna ya era dau tusaqati vakalevu na tacida. E levu na ka au vulica ena ka ratou cakava ni ratou tusaqati. Ratou sega ni cudru, se sauma na ka e caka vei ratou. Ratou kila ni qori ga na ka eda na sotava na lotu vaKarisito. Niu vakasamataka na nodrau ivakaraitaki na noqu itubutubu, au kila ni yavutaki nodrau vakabauta ena nodrau kila vinaka na ka dina, kei na nodrau veivolekati kei na Kalou. Au se nanuma vinaka tu ga na gauna au se gone kina, e laurai ena nona yalomalumalumu o tamaqu ni tekiduru qai masu.

E va tale ga qori o rau na itubutubu nei Mariya. Rau sega ni kila wale tu ga na ka dina, ia e ivakarau sara ga ni nodrau bula. Qori e vaqaqacotaka nona vakabauta o Mariya, e wilika qai vulica wasoma na iVolatabu. E dau kauaitaki ira tale ga na mataveitacini ena ivavakoso. Gauna mada ga e tauvimate bibi tu kina, e vukei ira tiko ga eso tale mera volekati Jiova. E dau tukuna mada ga vei au eso na tacida mera vakayaloqaqataki.

Cava e vukei iko mo vosota na ituvaki dredre?

E vukei au meu kua ni soro noqu vinakata me vakayagataki au tiko ga o Jiova, kei ira tale ga na mataveitacini. Au dau saga meu vukei ira na tacida era vesu tale tu ga. Au marautaka ni vakayagataki au o Jiova meu vukei ira, e vakayaloqaqataki au tale ga. Au vakadinadinataka sara ga nona karoni keda yadua o Jiova.

Na nodra veikauaitaki kei na nodra lomasavu na mataveitacini, au kila kina ni lomani au o Jiova qai vakadonui au. Na itovo qori e vukei au vakalevu ni oti e vica na vula nona takali o Mariya.

Eda vakadeitaka ni o Jiova ena lomani Yevgeniy, qai vakacegui koya ni muria nodratou ivakaraitaki ni yaloqaqa, kei na nodratou vosota nona lewenivuvale.—Same 86:17.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU