Ena ika4 June 2021, e vakataulewataka na Central District Court of Komsomolsk-on-Amur mai Rusia, ni cala o Brother Nikolay Aliyev. Ena vakatatabutaki me va veimama na yabaki.

Nikolay Aliyev

• Sucu: 1978 (Komsomolsk-on-Amur)

• Me baleti koya: Ni se gone e dau via kila na itekitekivu ni bula, na lomalagi kei na vuravura. Qori e uqeti koya me vaqara na kena isau mai na iVolatabu. Ni vakasamataka na ivakavuvuli i Jisu kei na nona dau veiyaloni, qori e uqeti koya me biuta na qito voravora. Papitaiso sara me iVakadinadina i Jiova ena 1993

  Rau vakamau kei Alesya ena 2016. Levu na ka rau dau taleitaka me rau cakava me vaka na gade, taubale ena ulunivanua kei na vakasisisi ena waicevata

Ena mataka lailai na ika22 ni Me 2020, era curuma vakaukaua na ovisa ni siti o Komsomolsk-on-Amur na nodrau vale o Nikolay kei Alesya. Nira curu yani era vacuki Nikolay qai lutu i ra, ra qai vaqaqara ina nodrau vale me lima na aua. Oti rau kau sara me rau lai vesu. Gauna rau vakatarogi tiko kina, era kaya na vakailesilesi vei Nikolay me veisautaka na nona lotu. Era kaya tale ga vei Alesya me muria na ka ratou kaya, ke sega ratou na cakava e dua na ka vei watina. Dina ga ni rau vakarerei, ena yakavi tiko ga ya rau sere me rau lesu i nodrau vale.

E vakayaloqaqataki Nikolay na nona dau vakasamataka e levu na sala e tokoni koya kina o Jiova ena gauna qori. E kaya: “Ni o vakacacani, o kila ni o na sega ni vosota rawa ena nomu kaukaua ga. Ena gauna qori au kauaitaka tale ga vakalevu na sala e dau sauma kina o Jiova na noda masu, kei na nona veidusimaki. Au vakadinadinataka na ka e kaya o Paula: ‘Niu malumalumu, au sa qai kaukaua.’”—2 Korinica 12:10.

Rau qara tiko ga o Nikolay kei Alesya na sala me rau yaloqaqa kina, me rau kua tale ga ni nuiqawaqawa. Rau tabaka na ka e kaya na Aisea 41:10, rau qai vakabira ina nodrau katoniwaililiwa. E kaya o Nikolay: “Ni dredre vakalevu na ituvaki au dau wilika na tikinivolatabu qori, qai dau vakayaloqaqataki au. Na veivosa qori e uqeti au meu kua ni leqataka e dua na ka. Dau vakaukauataki au nona kaya o Jiova ni na volekati au, me vaka ga ni mokoti au tiko na ligana imatau.” Eda nuidei ni o Jiova ena vakaukauataki ira na yalodina tiko vua.