ST. PETERSBURG, Rusia—A veisautaka na mataveilewai levu ena 22 Janueri, 2014 na lewa a tauca taumada na mataveilewai e ra me vakatabui na website vakadonui ni iVakadinadina i Jiova na jw.org e Rusia taucoko. Qori e dua na qaqa vakairogorogo vei ira na iVakadinadina i Jiova.

A veisautaka na mataveilewai levu e Tver na lewa a tauca na mataveilewai e ra e Tsentralniy ena ika7 ni Okosita, 2013. E kaya na mataveilewai levu ni sega ni dodonu na lewa e tauca na mataveilewai e ra me vakatabui na website, nira sega ni bau kacivi na iVakadinadina i Jiova mera tiko ena veilewai. A kauta na kisi ina mataveilewai na dauveibeitaki ni matanitu e Tver nira kaya na mataveilewai e Rusia ni tu ena jw.org na ivola ena “vakavuna na tiko yavavala.” Nira rogoca ga na iVakadinadina i Jiova na lewa a tauca na mataveilewai e ra, era kauta tani sara mai na jw.org na ivola vakaRusia e nanumi ni na vakavuna na tiko yavavala. E laveta na vakatatabu na mataveilewai levu ni raica nira muria na lawa e Rusia na iVakadinadina.

Era vinakata na iVakadinadina i Jiova me veisautaki na lewa era tauca na mataveilewai e Rusia me baleta eso na ivola e tukuni ni na “vakavuna na tiko yavavala.” Era sa vakauta vakavica na nodra kerekere ina mataveilewai e dau valataka na dodonu ni lewenivanua (European Court of Human Rights).

E kaya o Grigory Martynov na nodra gusunivosa na iVakadinadina i Jiova e Rusia: “Keimami marau nira kauaitaka na turaganilewa na yaga ni neimami website, kei na neimami yalorawarawa ni muria na lewa ni mataveilewai e Rusia. Keimami na valataka tiko ga na ka dina e vakamacalataki ena neimami ivola, kei na nodra dodonu na lewe i Rusia mera wilika na itukutuku vakaivolatabu keimami vakavulica.”

E kaya o J. R. Brown e gusunivosa ni itikotiko liu ni iVakadinadina i Jiova: “Era marautaka na qaqa qo na iVakadinadina e veiyasa i vuravura. Kena ibalebale sa rawa nira vakayagataka tiko ga na lewe i Rusia taucoko na website totoka qo.”

Gusunivosa:

Veiyasa i vuravura: J. R. Brown, Valenivolavola ni iTukutuku, talv. +1 718 560 5000

Rusia: Grigory Martynov, talv. +7 812 702 2691