Ena rogoci tale nona kerekere o Dennis Christensen ena Lotulevu na ika16 ni Me , 2019. Qo sa iotioti ni gauna me vakamacala kina na dauveibeitaki, kei na nona loya. A vakatarai tale ga me vosa me rauta ni dua na aua me vakamacalataka ni cala na ka e beitaki kina. Era se baci tiko ena veilewai qori na mata mai na veivanua kei ira na dauvolaitukutuku. Sa oti qo e rua na yabaki na kena rogo e vuravura nona vesu, ia e veiuqeti dina nira se kauaitaka tiko ga e levu nona veilewai.

A tuvanaki ena Vakaraubuka na ika17 ni Me, ni na rogoci tale kina nona kerekere. Ia ratou vakarota na turaganilewa me rube, qai rogoci ena Lotulevu na ika23 ni Me, ena 10 na kaloko ena mataka. Qori tale ga e iotioti ni gauna me vakamacalataka kina nona kerekere ni bera ni vakataulewa na turaganilewa. E sega ga ni kilai ena dua na kena macala ena ika23 ni Me se sega, se na tuvanaki e dua tale na siga me qai vakarogoi kina.

Eda vakayaloqaqataki ni donu tiko ga nodra rai na tacida me vakataki Dennis Christensen kei Sergey Skrynnikov, ra yalodina tale ga mai vu ni lomadra. E va tale ga qori noda rai me baleti ira na tacida e Rusia, qai tautauvata vinaka kei na nona rai na yapositolo o Paula me baleti ira na lewe i Cesalonaika, e kaya: “Keitou dau sakitaki kemuni kina ina ivavakoso ni Kalou ena vuku ni nomuni vosota kei na vakabauta ena veivakacacani kece kei na veika dredre oni sotava tiko.”—2 Cesalonaika 1:4.