Ena Vakaraubuka na ika30 ni Okosita, 2019, e vosa tale ena iotioti ni gauna ena valeniveilewai o Brother Valeriy Moskalenko. Qo na ka e tukuna (vakadewataki mai na vosa vakaRusia):

Vua na Turaganilewa, kei kemuni kece na tiko nikua. Au sa yabaki 52, au vesu ena yabaki sa oti, gauna qo sa sivia toka e dua na yabaki noqu vesu tiko.

Na iotioti ni noqu veilewai qo, au via vakamacalataki au ga vakalekaleka, noqu rai me baleta na kequ itotogi, kei na noqu rai me baleta na bula. Vua na turaganilewa, au nuitaka ni o na kila na vuna au sega ni cakitaka noqu vakabauta na Kalou, kei na vuna e sega ni cala kina qori.

Au sega tu ni iVakadinadina i Jiova. Rau dau yalovinaka noqu itubutubu, rau susugi au vinaka tale ga. Ia niu se gone, e tarai au vakalevu niu raica na veika tawadodonu e yaco tu e veivanua. Au dau vakasamataka, ‘E sega ni dodonu me yaco tiko qo, oya na kena sa qai levu ga na tamata ca kei na veidabui, ia era rarawa na daudina kei ira na tamata vinaka.’

Niu yabaki 24, oti noqu vakekeli vinaka kei na noqu vulica na iVolatabu me vicavata na vula, au qai kunea na isau ni noqu taro.

Tekivu mai ya, au sa saga meu yavutaka noqu vakatulewa ena rai ni Kalou, nona lawa kei na ivakavuvuli era vakamacalataki tu ena [iVolatabu], era muria tale ga o ira na [qarava na Kalou] ena veigauna sa sivi.

Au tiko vata kei tinaqu. Sa kenamarama toka qai dau vinakata noqu veivuke. Ena imatai ni Okosita 2018, ni toka duadua e vale o Na, e vakarota na Federal Security Service (FSB) vei ira na Special Forces mera basuka na mata ni neirau katuba. Era cakava qori me rawa nira vaqaqara e neirau vale.

Dua na ka nona taqaya o tinaqu. Oti ga nodra curuma na ovisa vakamatavulo na neirau vale, e mateniuto o Na qai vinakati me cicivaki vakatotolo e valenibula. Oti e 30 na miniti, au sa yaco i vale, au qai kila nira gole yani na ovisa. E tubu sara ga noqu dra, niu raica na ituvaki kei Na. Ia au sega ni cudru, au saga ga meu lewai au vinaka. Au sega vakadua ni cudru, me vaka ga e vinakati vei ira na lotu vaKarisito. E vakavulici au o Jiova na noqu Kalou meu dau yalovinaka, meu vakamarautaki koya tale ga.

Kerea moni vosoti au na Turaganilewa, e sega ni noqu ivakarau meu talanoataka na veika me baleti au, ia au kila ni na vinakati ena ituvaki qo.

Sa sivia qo e 25 na yabaki noqu dua na iVakadinadina i Jiova. Dua toka na gauna balavu qori, au sega tale ga ni bau vakavuna na tiko yavavala. Ia au kilai ena noqu itikotiko niu dau cakavinaka, gugumatua, qai veikauaitaki.

Ena ika20 ni Epereli 2017, e veisau kece qori niu beitaki niu vakavuna na tiko yavavala. Ena yavu cava? Cava e veisau kina? Sa veisau beka noqu ivakarau ni bula? Sega. Au sa voravora qai vakavuna nodra rarawa eso tale? Sega. Au sa beca na dodonu e laurai ena Article 28 ni Lawa kei Rusia? Sega. E sega mada ga ni laurai na yacaqu ena vakatulewa e tauca na Mataveilewai Cecere. E sega ni rawa vua e dua me kauta laivi vei au noqu dodonu ena Article 28. Cava ga na vuna au mai tu kina qo ena mataveilewai?

Au taura rawa ena neirau veivosaki kei na dauveivaqaqai, na vuna au vesu kina qai wawa veilewai, oya niu vakabauta qai vakayagataka na yaca ni Kalou Cecere o Jiova. E sega ni dua na kena cala qori. Na Kalou e digia na yacana, e vinakata tale ga me maroroi ena iVolatabu.

Meu tokaruataka tale, e ka vakalialia meu saqata na loma ni Kalou e vakamatatataki tu ena iVolatabu. Se vakacava sara na kaukaua ni veivakacacani, keu totogimate mada ga, au tukuna vakadodonu niu na sega ni biuti Jiova na Dauveibuli Cecere.

Kemuni na Turaganilewa, era kilai e veiyasa i vuravura na iVakadinadina i Jiova nira dau veimaliwai, ra dau veiyaloni tale ga. Ena levu na vanua e veiyasa i vuravura era dokai ena nodra dodonu nira dua na iVakadinadina i Jiova. Au na marautaka tale ga ke rokovi na neimami dodonu na iVakadinadina i Jiova e Rusia, me rawa tale ga niu sokalou ena galala.

E sega ni dua noqu cala ena veibeitaki e caka, au kerea kina na mataveilewai meu kua ni beitaki!

Vinaka vakalevu!