Ena ika23 ni Me, e rogoci tale nona kisi o Dennis, e iotioti tale ga ni gauna me vosa kina ena mataveilewai. Wilika mada na veika e tukuna (vakadewataki mai na vosa vakaRusia) ena mataveilewai:

Au vakavinavinakataki ira kece na veitokoni ena loma ni rua na yabaki e caka tiko kina na veilewai qo.

Taumada au vakavinavinakataki watiqu o Irina. Tekivu na gauna au biu kina e valeniveivesu e cakava na ka kece e rawata me tokoni au. E kauaitaki au, kauta mai noqu isulu, na kequ, mequ wainimate, kei na so tale na ka au gadreva ena vanua au vesu tiko kina. E tokoni au vakayalo, vakayago tale ga ena nona dau sikovi au, kei na ivola e vakauta mai e veisiga.

Noqu daulomani, e uqeti au vakalevu na dei ni nomu vakabauta, vosota, yalomalua, nomu lomani au kei na nomu taleitaka na ka dina, kei na nomu ivakarau ni rai. Au vinakata mo kila niu lomani iko vakalevu, dua na ka noqu mareqeti iko!

Au vakavinavinakataki ratou noqu vuvale e Denmark, vakabibi o tamaqu sa dua toka na itaba, kei na ganequ. Dua na ka noqu dau nanumi kemudrau. Au lomani kemudrau, vakavinavinakataka tale ga na veika drau cakava ena vukuqu. Na gauna au vesu tu kina vakawawa, drau tokoni au ena nomudrau volavola mai kei na qiri. Au nuidei ni drau na sega ni soro, au nuitaka tale ga ni dua na siga tou na sota tale vakavuvale.

Au vakavinavinakataki ira tale ga noqu itokani kece e veiyasa i vuravura. Oni tokoni au ena nomuni ivola, vosa veiuqeti, droini totoka kei na iloloma. Au vakadeitaka kina niu sega ni tu taudua, au lewena tale ga e dua na vuvale levu.

Vei kemuni noqu itokani, na ivola kece au wilika lailai se levu, e veiuqeti qai veivakayaloqaqataki dina. Yalovinaka kua ni yalolailai keu sega ni volavola lesu yani. Au yalataka ni na dua na gauna ga qo au na sotavi kemuni, vakavinavinakataki kemuni, qai mokoti kemuni!

Au vakavinavinakataka na ebasi e Denmark, e Moscow kei ira kece na cakacaka kina. Oni tiko ena veilewai, oni dau sikovi au tale ga niu vesu toka vakawawa. E uqeti au dina nomuni ivakasala, veidusimaki kei na nomuni veivakayaloqaqataki. Au marautaka dina na veivuke oni vakarautaka.

Au vakavinavinakataka tale ga na Mataveilewai e Rogoca Tale na Kisi, e vakadonuya me rogoci tale na noqu kerekere. Ena so na gauna au sega ni kila na ka e veivosakitaki tiko ke vakayagataki na vidio me rogoci kina eso tale na kisi. E dredre sara ga meu rogoca na ka e veivosakitaki, levu na gauna au na vakilakila tale na ka e yaco tiko. E dredre kina meu valataka noqu dodonu. Kuria ya, ni vakayagataki na vidio ena vanua o vesu kina, e vaka ga na manumanu e tiko ena zoo. E veicalati sara ga, e ivakarau vakaloloma tale ga ena gauna qo.

Qo sa voleka ni rua na yabaki noqu vesu tu vakawawa, sa sivia tale ga e 15 na vula na kena rube tiko na kisi qo. E vinakati dina na yaloqaqa ena ituvaki qo, bibi kina meu vosota, kua ni soro, se yalolailai. E kaya na Filipai wase e 4, tikina e 13: “Au rawata na ka kece ena vuku i koya e vakaukauataki au.” a E kaya na Aisea wase e 12, tikina e 2: “Raica! E noqu ivakabula na Kalou. Au na nuitaka, au na sega ni rere, ni o Ja Jiova e noqu kaukaua, e noqu qaqa, e noqu ivakabula o koya.”

Ena gauna kece qo e vukei au tu ga na noqu Kalou o Jiova, meu vosota na ka kece, kua ni soro, qai yaloqaqa. Meu mamarau, qai matadredredre tiko ga. Au vakavinavinakataka vakalevu qori, e ka dokai tale ga niu dua na iVakadinadina i Jiova.

Levu era taroga na noqu rai me baleta na veilewai qo. E sega ni rawarawa dina noqu vesu tu vakawawa me dua na gauna balavu, tu veiyawaki kei watiqu, noqu vuvale kei na itokani. Dua na ka noqu galili ena rua na yabaki sa oti. Au bula tiko, ia au vakatabui ena ka kece. E 23 na aua noqu tu ga ena noqu sela, e 3 mita kena raba, qai 6 na mita na kena cere. Dua tale na aua, au na taubale ena vanua ni vakaukauayago, e 3 tale ga mita kena raba, 6 na mita na kena cere, vinaka ga ni toka e tuba. Na rua na yabaki qori au sotavi ira kina eso tale, rawa tale ga niu veitalanoa kina. Au siqema tale ga ni levu vei ira era vinakata tale ga me donu na veivaqaqai kei na veilewai e lewadodonu. Levu era vakabauta ni sega ni rogoci na nodra nanuma, qori tale ga na ka au vakila ena loma ni gauna kece qori. Au saga meu tokoni ira, vakayaloqaqataki ira tale ga niu kila deivaki tu ni o Jisu Karisito ena cakava tale ga qori.

E levu noqu itokani, eso era rogoca e vica na kisi ni veilewai, eso tale era volavola mai. Eso au kilai ira vinaka, eso tale e sega sara. Eso keimami lotu vata, na kena vo e sega. Ia era tokoni au ena nodra sega ni duavata kei na lewa ca e Rusia. Qori na vanua era sa kilai tu kina na iVakadinadina i Jiova, nira daubasulawa qai vakavuna na tiko yavavala. Era sa sega ni kilai mera lewenivanua mamarau qai uqeta na veilomani. Na rai qori e sega ni vakaibalebale, e vakasama lialia tale ga. Levu era kurabui ena ka e yaco tiko qo e Rusia.

Eso era taroga ke veisautaka noqu vakabauta na kisi ni basulawa qo. Au vakavinavinakataka ga ni vaqaqacotaka vakalevu noqu vakabauta na kisi qori, au vakadinata kina na ka e volai ena Jemesa wase e 1, tikina e 2 ina 4: “Moni marau na taciqu ni oni sotava na veimataqali veivakatovolei, oni kila ni vakatubura na vosota na vakatovolei ni nomuni vakabauta ena sala qo. Ia me tini vinaka na cakacaka ni vosota moni taucoko kina, moni vinaka ena ka kece, me kua ni dua na ka e yali vei kemuni.”

Au sega ni uasivi, ia au vulica meu vosovoso qai marau tiko ga niu vakacacani. Ia e bibi sara, meu toro voleka tiko ga vua na noqu Kalou o Jiova. E gu na lomaqu meu tukuni koya kei na nona inaki vei ira eso tale. Meu vunautaka tiko ga na itukutuku vinaka ni Matanitu ni Kalou, na iwali duadua ga ni noda leqa, meu tukuna tale ga na itukutuku vinaka ena iVolatabu me baleta na bula vakacegu qai tawamudu ena Parataisi e vuravura, qai vukei ira eso tale mera toro voleka vua na Dauveibuli, vakabauti koya, kei na nona yalayala.

Na veika au talaucaka qo e vakatokai me nona “iTautau o koya e beitaki.” De dua e iotioti tale ga ni vosa mo rogoca vei au nikua. Ena rairai iotioti tale ga ni veilewai me baleta na kisi qo, kei na rua na yabaki ni noqu vesu tu. Ia au via vakadeitaka e sega ni iotioti ni noqu vosa me baleta na kisi qo, kei na veika tawadodonu e yaco tiko e Rusia era vakaleqai kina na lewenivanua e sega nodra cala. Au se qai tekivu ga, e levu tale na ka meu vakaraitaka vei kemuni. Au na sega ni galuvaka, ni sega ni dua noqu cala se vunia e dua na ka. E savasava noqu lewaeloma niu sega ni cala, se beca e dua na lawa e Rusia, sega tale ga ni dua na ka au maduataka.

E veivakamaduataki na ka au sotava tiko qo kei ira na vo ni iVakadinadina i Jiova e Rusia. Keimami beitaki ni vakavuna na tiko yavavala, vaqaqai, totogitaki, vesu na ka keimami taukena, vakacacani, vakatotogani tale ga. Qori e veivakalolomataki dina. Ena qai kilai ga na ka dina, vakayacori tale ga na lewadodonu. E kaya na Kalatia wase e 6, tikina e 7: “Kua ni nanuma cala: Na Kalou ena sega ni vakalialiai. Na ka kece e kaburaka e dua ena tamusuka tale ga.”

E totogitaki au na mataveilewai meu ono na yabaki e valeniveivesu. Cava na vuna? Sega ni dua na ka! E sega na ivakadinadina matata me vakaraitaka noqu cala. Ena yasana adua, e tu na ivakadinadina niu rokova noqu dodonu me vaka e tukuni ena Article 28 ni Lawa e Rusia. Au doka na lawa ni matanitu o Rusia, au daudina tale ga. Au lotu vaKarisito, au iVakadinadina i Jiova, au lomani ira tale ga na lewenivanua. Cava au totogitaki kina? Cava au bala kina e valeniveivesu me ono na yabaki? Sega ni dua na ka. Dua dina na ivalavala tawadodonu.

Au nuitaka ni na laveta na noqu kisi na mataveilewai e dau rogoca tale na kisi, me muria kina lawa, qai raica me tau vakadodonu na lewa. Au nuitaka ni na tinia na mataveilewai nodra vakacacani na lotu e Rusia. Au nuitaka tale ga ni na vakaraitaka e veiyasa i vuravura na mataveilewai qo ni kilai o Rusia na vanua e rawa ni marautaki kina na galala ni sokalou.

Dua na gauna tiko ga qo eda na vakadinata na parofisai ena Maika wase e 4, tikina e 3 kei na 4, “Ena vakataulewa o koya ena vukudra e levu na lewe ni veivanua . . . Era na tukitukia na nodra iseleiwau me batinisiviyara Kei na nodra moto me isele ni sasamaki. Ena sega ni lave iseleiwau e dua na matanitu ina dua tale na matanitu, era na sega ni vulica tale na ivalu. Era na dui dabe ena ruku ni nodra vaini kei na ruku ni nodra vunilolo, ena sega ni dua me vakarerei ira.”

E dau lewadodonu na Kalou, ena sega ni laurai ena nona veiliutaki na veivala, itovo kaukaua, se na ivalu. Ena vakadinadinataki kina ga na duavata, sega tale ga na lomaocaoca. Kena ibalebale era na vakila na kawatamata na marau dina.

Na nomuni vakatulewa dodonu nikua, na Turaganilewa, oni sa vukei ira tiko e levu mera lewa dodonu, vakila na vakacegu. Oni vukei ira talega mera kua ni rere, rarawa se vakila na veika tawadodonu. Au nuitaka ni oni na vakatulewa vakadodonu!