Me 10, 2018
RUSIA
iMatai ni Gauna me Rogoci Kina na Kisi Nei Dennis Christensen
Ena ika23 ni Epereli, 2018, e rogoci tale ena Valeniveilewai ni Yasana o Zheleznodorozhniy e Oryol, na kisi ni veilewai me baleti Dennis Christensen. E turaga ni Denmark, e dua tale ga vei ira na iVakadinadina i Jiova, e vesu ni tiko ena nodra soqoni ni lotu ena Me 2017, e vesu tu vakawawa ena gauna kece qori.
E beitaki Christensen na dauveivaqaqai, o Mr. Fomin, ni ‘tuvanaka nodra cakacaka na isoqosoqo e dau vakavuna na tiko yavavala,’ se na isoqosoqo lotu ni iVakadinadina i Jiova e Oryol (Local Religious Organization) (LRO), e se sogo sara ena June 2016 ni beitaki ni dau vakavuna na tiko yavavala. Ratou sega ni duavata ena veibeitaki qori na loya nei Christensen, ratou kaya ni sega ni isoqosoqo vakalawa na ivavakoso ni iVakadinadina i Jiova e Oryol, ia era ilawalawa mamarau era dau sota vata mera vulica na iVolatabu. Ratou tukuna vakadodonu na nona loya ni sega ni vakatabui ira na iVakadinadina i Jiova o ira na ivakalesilesi kei Rusia, ratou kaya tale ga ni taqomaki ena yavu ni vakavulewa na dodonu ni veika e vakabauta e dua. * Koya gona na nona vakaitavi o Christensen ena nodra soqoni vakalotu, e vakaraitaka tiko ga kina na veika e vakabauta.
E tekivu soli na ivakadinadina ena ika24 ni Epereli, 2018. E kaciva na dauveivaqaqai e dua vei ira na ivakalesilesi ni veitaqomaki ni matanitu (Federal Security Service) me soli ivakadinadina. E kaya ni se biu sara na vidio ena 2017 me yadravi tu kina na Vale ni Soqoni. Ia e kaya ni sega ni kila na ka e yaco tiko e loma, ni laurai ga ena katokatoni qori nona kidavaki ira tiko na gole yani o Christensen. E kaciva tale na dauveivaqaqai e dua na yalewa e sa tikova oti nodra soqoni na iVakadinadina i Jiova e Oryol. Ia e sega ni tukuna rawa e dua na ka me baleta na veika e cakava o Christensen. Na iotioti ni gauna e tiko kina nodra soqoni, oya ni se bera ni sogo nodra valenivolavola e Oryol.
O Irina Christensen
Ena siga tarava, e kaciva na dauveivaqaqai e dua na marama yabaki 78, e dua tale ga vei ira na iVakadinadina i Jiova me soli ivakadinadina. Ni oti e rua veimama na aua nona vakatarogi tiko ena inaki me rawa ni soli “ivakadinadina,” e vakamacalataka tu ga nira sega ni vaka dairekita se iliuliu ena nodra soqoni, era sega tale ga ni vakayagataka na ivola ni lotu e vakatabui e Rusia.
Ena rogoci tale na kisi ena ika14 ni Me, 2018, e tuvanaki tale ga me na rogoci tiko me vica vata na siga ena vula tiko ga qori. Ke beitaki o Christensen, ena rawa ni bala i valeniveivesu me ono ina tini na yabaki. Era kurabuitaka na iVakadinadina i Jiova e vuravura raraba na ka e rawa ni yaco qo, era kauaitaka tale ga nona bula o Christensen kei na watina o Irina.
^ para. 3 E kaya na Mataveilewai Cecere ena nona tokona na vakatulewa me baleta na kena vakatabui na isoqosoqo lotu ni iVakadinadina i Jiova e Oryol: “Ena sega ni beci na dodonu ni nona digia e dua na lewenilotu na ka e vakabauta, ena sega tale ga ni kau tani vei ira na galala ni nodra sokalou e sega ni vakayagataki kina na nodra ivola vakalotu na ilawalawa dau vakavuna na tiko yavavala.”