Ena Okotova 2018, era curuma vakaukaua na ovisa e sivia e 30 na vale ena ra kei Rusia. Ratou vesu kina e ono na tacida tagane, kei na rua na tacida yalewa ratou qai lai wawa veilewai tiko. E tukuni ni vakavuna na tiko yavavala na nodratou cakacaka. Qo sa vesu tu vakatawadodonu e le 25 na tacida, e le 18 tale era vakatabui mera biuta na nodra vale.

ika7 ni Okotova, Sychyovka, ena Yasayasa o Smolensk—Era vaqaqara na ovisa kei ira na sotia vakamatavulo ena va na vale. Rau vesu kina e rua na tacida yalewa o Nataliya Sorokina e yabaki 43, kei Mariya Troshina e yabaki 41. Oti e rua na siga na nodrau vesu, e vakatulewataka na mataveilewai na Leninsky District Court me rau wawa veilewai tiko me yacova na ika19 ni Noveba, 2018. Ia ena ika16 ni Noveba, 2018 e vakatulewataka na mataveilewai qori me toso na nodrau wawa ina tolu na vula, qori me yacova sara na ika19 ni Feperueri, 2019.

ika9 ni Okotova, Kirov, ena Yasayasa o Kirov—Rauta ni 19 na vale e curumi vakaukaua. Ratou vesu e lima na qase ni ivavakoso, ratou qai totogi me ratou wawa veilewai. O (Maksim Khalturin, Vladimir Korobeynikov, Andrey Suvorkov, kei Evgeniy Suvorkov) ratou lewenivanua ga e Rusia, kei Andrzej Oniszczuk, e lewenivanua mai Poladi. O Andrzej e ikarua ni iVakadinadina i Jiova e tiko vulagi e Rusia me vesu vakatawadodonu ena vuku ni nona vakabauta vaKarisito. Kena imatai o Dennis Christensen mai Denmark.

ika18 ni Okotova, Dyurtyuli, Ripabuliki kei Bashkortostan—Era curuma vakaukaua na ovisa e 11 na vale. Era taura na ilavo, kad ni baqe, itaba, ivola, kompiuta, kad ni talevoni, kei na talevoni. E vesu o Anton Lemeshev e dua na qase ni ivavakoso, qai totogitaki me wawa veilewai ni oti e rua na vula. E sere ena ika31 ni Okotova, 2018, qai vakaroti me tiko ga vakadua e vale me yacova mai nikua.

Era sotava na tacida qori na veivakatovolei ni curumi vakaukaua nodra vale, e tauri tale ga na ka era taukena. Ia era veimasulaki tiko ga na mataveitacini e kea, ra qai vukei ira na lewe ni nodra vuvale. Meda cavuta mada ga na yacadra nida masuti Jiova tiko ga vakamataveitacini e vuravura raraba, me vukei ira na nona dausokalou yalodina e Rusia me yacova ni wali vakadua na leqa qori.—Efeso 6:18.