Era dau soqoni na iVakadinadina i Jiova e veimacawa, ia e tarovi qori ena ika25 ni Me 2017 ena korolevu e Rusia o Oryol. Era vakaitavi kina na ovisa vakaiyaragi kei na vakailesilesi ni tabana ni veitaqomaki ni matanitu e kilai me Federal Security Service. Era tukuna na kena vakailesilesi ni vakavuna na tikoyavavala na nodra tokona tiko ga na iVakadinadina na nodra cakacaka ni lotu. E vakatabuya na matanitu o Rusia ena ika14 ni June 2016 na nodra isoqosoqo na iVakadinadina i Jiova e Oryol. E volai na kedra itukutuku matailalai na tiko kina, kau vakaukaua na nodra iyaya vakalivaliva, yanaraki tale ga na nodra vale.

Era lai vesu na tagane era lewena na ivavakoso e Oryol ena nodra valenivolavola na tabana ni veitaqomaki, wili kina o Dennis Christensen na turaga ni Denmark, e qase tale ga ni ivavakoso. E kerea totolo na loya dauveibeitaki ina mataveilewai ni yasana o Sovietsky, me vesu tiko ga o Christensen ni bera ni veilewai, mera kumuna eso tale na ivakadinadina ena ka e beitaki kina. A vakadonuya na kerekere qori o Turaganilewa Svetlana Naumova, mani vesu o Christensen me rua na vula. Ke vakadinadinataki ni cala, ena rawa ni curu e valeniveivesu me rauta ni yabaki 6 ina 10, salavata kei na lawa e beitaki kina me baleta na basulawa ena Tikina e 282.2, wase 1.

Era dau sokalou tiko vakaivavakoso e Oryol, ia e sega ni vakadonui tu vakalawa. E vakadeitaka ga qo nira via saga na vakailesilesi e Rusia me vakaleqai na isoqosoqo vakalawa ni iVakadinadina i Jiova, me tarovi tale ga na nodra sokalou. E tautauvata qori kei na veika e yacovi ira na iVakadinadina e Taganrog. E vakatabui na nodra cakacaka ra qai beitaki e le 16 ena ivavakoso ni vakavuna na tikoyavavala na nodra dau soqoni vata mera sokalou. E vakadinadinataki ena ika16 ni Noveba 2015 ni ratou cala, ia e rube tu na kedratou itotogi. E dikeva tiko na kedratou itukutuku na Mataveilewai ni Dodonu ni Lewenivanua e Urope.