iRogo Vou: Sega tale ni rogoci na veilewai a dodonu me vakayacori ena ika7 ni June, 2017.

Ena ika7 ni June 2017 ena 2 na kaloko, ena rogoca kina na Mataveilewai e ra e Oryol na kerekere me rogoci tale na kisi ni nona wawa veilewai na turaga ni Denmark o Dennis Christensen. O Christensen, e dua na qase ena ivavakoso ni iVakadinadina i Jiova e Oryol. A vesu ena ika25 ni Me 2017, nira curu vakailoa na ovisa ena nodra soqo ni lotu ena lomanimacawa ya.

Sa dede nona saqata tiko na matanitu o Rusia na galala ni nodra sokalou na iVakadinadina i Jiova, e beitaki gona na nodra isoqosoqo e Oryol ni vakavuna na “tikoyavavala,” mani vakatabui ena June 2016. Sa vakatabui ena gauna qo na Valenivolavola kei na iSoqosoqo ni iVakadinadina i Jiova e Rusia, e kaya kina na Tabana ni Veitaqomaki ni Matanitu (Federal Security Service), ni cala vakalawa ke ra dau soqoni vata na iVakadinadina i Jiova e Oryol mera sokalou, nira na tomana tiko kina na nodra cakacaka e vakavuna na tikoyavavala.

Eratou tekivu vaqaqa na Tabana ni Veitaqomaki na veika me baleti Christensen, ni ratou tukuna ni lewena tiko na isoqosoqo sa vakatabui e Oryol. Ia e sega ni lewena o Christensen na isoqosoqo vakalawa qori. Sa wawa veilewai tiko qo me yacova na ika23 ni Julai 2017, ni nanuma na dauveibeitaki ni rawa ni dro me vaka ni vulagi, e rawa ni dro ni bera ni kumuna na Tabana ni Veitaqomaki na ivakadinadina me lewai kina.

Me ikuri ni kena kerei me rogoci tale na kisi me baleti Christensen, era kerekere na iVakadinadina i Jiova ina mataveilewai mai vanuatani. Ena vuku ni vakatulewa ni Mataveilewai Cecere e Rusia, era vakacacani ira kina e levu na iVakadinadina i Jiova na lewenivanua, levu tale ga na itovo voravora era vakayacora na vakailesilesi ni matanitu.