Era curuma vakaukaua na ovisa mai na rauta e vitu na siti ena veiyasa i Rusia na nodra vale na iVakadinadina i Jiova. Era cakacaka vata e dua na tabana ni ovisa e vakatokai na (OMON), nira vakamatavulo, era tauri dakai tale ga. Era dodoka e matadra na dakai, era vesu kece na gone kei na qase mera lai vakatarogi.

Ena yabaki sa oti, e rauta ni tini na veivaqaqai era vakayacora na vakailesilesi ni matanitu, era vesu tale ga kina e lima na tagane era iVakadinadina, wili kina o Dennis Christensen, e se vesu tu mai vakawawa ena ika25 ni Me, 2017. O Arkadya Akopyan e dua tale na iVakadinadina sa yabaki 69, e veilewaitaki tiko qo ena vanua o Kabardino-Balkaria. Ke ra beitaki kece ena cala nira dau sosoqoni vata, e rawa nira curu e valeniveivesu me rua ina tini na yabaki.

Ena ika20 ni Epereli, 2017, e sogota na Mataveilewai Cecere kei Rusia nodra Valenivolavola ni iVakadinadina i Jiova kei na 395 na veitabana vakalawa ni nodra vanua. Ni rogoci tiko na kisi ena Mataveilewai Cecere, e kaya na Matanitu o Rusia ni kena sogo na veitabana vakalawa ni iVakadinadina i Jiova, e sega ni tarova qori nodra galala ni sokalou. Ia, e veicalati na ka e tukuna kei na ka e cakava tiko.

Nira sa sogota na ivakalesilesi ni matanitu o Rusia nodra veitabana vakalawa na iVakadinadina i Jiova, era vesuka tale ga nodra tikiniqele kei na valenivolavola, qo era sa tekivu saqati ira yadudua kei na nodra sokalou. Ena gauna qo sa tabu vakalawa vei ira e sivia na 175,000 na iVakadinadina i Jiova e Rusia mera vakaraitaka na ka era vakabauta.

Me tekivu mai ena Janueri 2018, era sa qai taketetaki ira ga vakalevu na iVakadinadina i Jiova na veitabana vakalawa.

Epereli 20, 2018, e Shuya, ena yasana o Ivanovo: Era vaqaqara na ovisa ena nodratou vale e va na iVakadinadina i Jiova. Era vesuki Dmitriy Mikhailov ena siteseni ni ovisa, oti era sereki koya tale. Era dolava tale e dua na kisi ni veivaqaqai ra qai beitaki koya ena Article 282.2(2) ena Lawa ni Basulawa ni ‘vakaitavi ena isoqosoqo e dau vakavuna na tiko yavavala.’ E sega ni vakatarai me biubiu mai Shuya.

Epereli 19, 2018, e Vladivostok: Era curuma vakaukaua e dua na vale na ovisa kei na Tabana ni Veitaqomaki ni Matanitu (Federal Security Service) (FSB) ra qai vesuki Valentin Osadchuk kei na tolu tale na marama itabaqase ina siteseni ni ovisa me ratou lai vakatarogi. Era beitaki Osadchuk na ivakalesilesi ena Article 282.2(2) ena Lawa ni Basulawa, ena rawa kina ni curu i valeniveivesu me rua ina va na yabaki, ena vesu tiko ga me wawa veilewai. Ena ika23 ni Epereli, e vakarota na Mataveilewai ni Yasana o Frunzenskiy me vesu tiko ga me yacova na ika20 ni June,  2018 ni wawa veilewai tiko. E vesu tu qo ena valeniveivesu (Investigation Prison No. 1) e Vladivostok.

Epereli 18 2018, e Polyarny, ena Yasana o Murmansk: Ena dua na yakavi, era curuma vakaukaua na ovisa kei na dua tale na tabana ni ovisa era vakatokai na OMON, na vale nei Roman Markin, ra qai basuka nona katuba nira vakamatavulo tu, era tauri dakai tale ga. Era biligi koya nira dodoka tu vua na dakai. Ni raica qori na luvena yalewa e davo sobu tale ga ina fuloa qai tabonaka na uluna ena ligana. Ni oti nodra vaqaqara wavoki ena nona vale, era kauti Markin sara ina siteseni ni ovisa me lai vesu tu vakawawa ni waraki tiko me rogoci nona kisi.

Ena yakavi vata tiko ga qori, era vaqaqara tale ga na ovisa ena 14 na vale ni iVakadinadina ena yasayasa vata ga ya, era vesuka nodra talevoni, tablet, kei na so tale na iyaya. Ni oti qori era kauti ira sara ina siteseni ni ovisa mera lai vakatarogi kina. Era dolava na ivakalesilesi e dua na kisi ni veivaqaqai me baleti Markin, kei na dua tale na iVakadinadina, o Viktor Trofimov. Rau beitaki ena Article 282.2(1) ena Lawa ni Basulawa ni rau ‘tuvanaka nodra cakacaka na isoqosoqo e dau vakavuna na tiko yavavala.’ Ke rau beitaki ena cala qori, e rawa ni rau curu me ono ina tini na yabaki e valeniveivesu. Rau vesu tiko vakawawa qo ena valeniveivesu e Murmansk (Prison No. 1).

Epereli 10, 2018, ena Tikina o Zaton, e Ufa: Ena veimama ni ono ina vitu ena matakalailai, era curuma vakaukaua na dauveivaqaqai kei na ovisa nodra vale e vica vata na iVakadinadina. Ni caka tiko na vaqaqara, era vakatarogi ira tale ga na iVakadinadina. E kaya e dua vei ira na ovisa: “Oni na sere ga ke oni kaya ni oni sega ni lewe ni isoqosoqo ni iVakadinadina i Jiova.” Ena dua tale na ituvaki, e kaya tale e dua na ovisa: “Keimami sa na vakawabokotaki kemuni.” Era kau kece na iVakadinadina ina siteseni ni ovisa me rawa ni lai tauri na mawe ni qaqalo ni ligadra, mera vakatarogi tale ga.

Ni caka tiko na vaqaqara ena nodrau vale na Khafizov, era vaqaqara nira dodoka tu vei rau na dakai. Ni oti nodra vaqaqara, e tauri yalewa na ovisa, e kolotaki koya ina loma ni motoka, e kauti koya sara ina siteseni me lai vakatarogi kina. E sega ni iVakadinadina i Jiova o tagane.

Era curuma vakaukaua na ovisa na vale nei Anatoliy Vilitkevich, era vesuki koya tale ga. Era kaya vei watina ni na sega ni raici watina tale “me dua na gauna balavu.” Era beitaki koya na ivakalesilesi ena Article 282.2(1) ni Lawa ni Basulawa ni ‘tuvanaka nodra cakacaka na isoqosoqo e dau vakavuna na tiko yavavala,’ e vesu tale tiko ga vakawawa me yacova na ika2 ni June, 2018. Ke beitaki ena cala qori, ena rawa ni tini na yabaki e valeniveivesu.

Maji 2018, e Oryol: Ena kisi ni veilewai me baleti Dennis Christensen, era dolava tale ga e dua na kisi ni veilewai me baleta e dua tale na iVakadinadina, o Sergey Skrynnikov, qori ni oti nodra vaqaqara ena vitu na vale e Oryol ena vula o Me 2017. Se sega ni beitaki o Mr. Skrynnikov. Ia e beitaki ena Article 282.2(2) ni ‘vakaitavi ena nodra cakacaka na isoqosoqo e dau vakavuna na tiko yavavala.’ Ke beitaki ena cala qori, ena rawa ni curu me rua ina va na yabaki e valeniveivesu.

Feperueri 7, 2018, e Belgorod: Era curuma vakaukaua e rauta ni tini na vale ni iVakadinadina e dua na iwiliwili levu ni ovisa. Era kolotaki ira e vica vata na itaukeinivale ina fuloa, era vakaraviti ira tale ga e lalaga. Era vaqaqara ena nodra vale, e vesu tale ga nodra iyaya vakalivaliva, pasipote, itaba, kei na ilavo. Era kauti ira kece tale ga ina siteseni ni ovisa, vakatarogi ira, ra qai sereki ira kece vakavo ga o Anatoly Shalyapin kei Sergei Voikov. Era vesuki rau tiko na ovisa me 48 na aua ni bera ni rau sere. Ia e sega ni vakatarai me rau biubiu mai Belgorod.

Janueri 23, 2018, e Kemerovo: Era vaqaqara na ovisa ena 12 na vale ni iVakadinadina, era vesuka tale ga nodra iyaya vakalivaliva, ivola ni lotu, kei na levu tale na ivola. Ni bera na vaqaqara, e soqoni vata kei ira na iVakadinadina e dua e kaya ni dua tale ga vei ira na iVakadinadina i Jiova, e katona na nodra soqoni mani solia sara vei ira na ovisa. Era yavutaka ena katokatoni qori na ivakalesilesi na veivaqaqai era cakava.

Me ikuri ni veika era cakava qori na ovisa kei na vakailesilesi ni veitaqomaki ni matanitu (FSB), era vakarota na ivakalesilesi ni matanitu o Rusia ni rawa nira vesu tale ga na gone era iVakadinadina i Jiova me lai “veisautaki nodra ivakarau ni vakabauta” (Resocialization). Ena ika14 ni Noveba, 2017, e vakatulewataka na Mataveilewai Cecere kei Rusia (Supreme Court Plenum of the Russian Federation), ena ivola ni lawa na Resolution Nb. 44, ni rawa ina “mataveilewai me kauta tani nodra dodonu na itubutubu” ke ra okati ira tiko ga na luvedra ena isoqosoqo lotu e sa vakatokai ni “dau vakavuna na tiko yavavala.”

Ena ika23 ni Noveba, 2017, e vakaraitaka na Tabana ni vuli kei na Saenisi e Rusia taucoko na “vakatutu,” mera vakavulici tale na gone kece era vakamuai tu ena ivakavuvuli ni “lotu era dau vakavuna na duiyaloyalo.” E tukuna na Tabana ni vuli ni rua ga na ilawalawa gone era okati kina, o ira era lewe ni ISIS kei ira na iVakadinadina i Jiova. E dikevi ni “levu sara na gone kei na itabagone” era iVakadinadina i Jiova nodra itubutubu. Ena gauna qo se sega ni dua na gone iVakadinadina e kau tani vei rau nona itubutubu.

Se sega ni dua tale na matanitu e lewe ni iSoqosoqo kei Urope (Council of Europe) e cakava na veivakalolomataki qo ina dua na isoqosoqo lotu. Sa sega ni rawa nira soqoni vata tale e matanalevu o ira na iVakadinadina i Jiova e Rusia, se mera wilika se vulica na iVolatabu. Me vaka ga era cakava ena veiliutaki makawa ni Soviet, era na soqoni lo mera kua kina ni vesu se beitaki vakalawa.

Era rarawataka dina na iVakadinadina i Jiova e vuravura raraba na veika era sotava tiko o ira era vakabauta vata e Rusia, kei na veika era vakila tiko vakayago, vakayalo tale ga ena vuku ni veika e tokona sara tiko ga na matanitu. E kaya o Philip Brumley, e Daunivakasala ni Veika Vakalawa ni iVakadinadina i Jiova: “Me tinia na matanitu o Rusia na vakayagataki cala ni lewa, me muria tale ga na sasaga e sa vakayacori tiko e vuravura raraba me baleta na kena dokai na dodonu ni lewenivanua kei na galala ni veika era vakabauta. Ia qo era sa sega ga ni saqata nodra veitabana vakalawa na iVakadinadina, era sa vesuki ira yadudua sara tiko ga na iVakadinadina i Jiova e Rusia, cava tale ena caka qo?”