Ena ika9 ni Feperueri 2017, e lewa na Mataveilewai Cecere e Rusia me vakatabui na isoqosoqo vakalawa ni iVakadinadina i Jiova e Birobidzhan. E tokona na Mataveilewai Cecere na lewa ni mataveilewai e ra, e vakaraitaka nira dau vakavuna na tikoyavavala, e vakatabuya tale ga na nodra cakacaka ni lotu.

E yavutaki na lewa qori ena ivakadinadina era bulia ga. Ena Feperueri 2015 kei na Janueri 2016, era lai biuta lo na ovisa na ivola ni lotu e vakatabui ena dua na vale era dau sauma na iVakadinadina i Jiova mera sokalou kina, oti era qai “kunea” tale. Ena ka e yaco ena vula o Janueri, era tarova na ovisa vakamatavulo e dua na nodra soqoni na iVakadinadina i Jiova ra qai biuta lo ena ruku ni idabedabe na ivola, nira se tiko ga na lewenilotu.

Na iSoqosoqo ni iVakadinadina i Jiova e Birobidzhan, e tiko ena nodra yasayasa na Jiu tu vakataki ira e Rusia (Jewish Autonomous Region of Russia). Qo na imatai ni isoqosoqo e vakatabui ni oti na vakatulewa ni mataveilewai e Moscow me sa tekivu muria na itikotiko liu ni iVakadinadina i Jiova na ivakaro mai na Tabana ni Veibeitaki.