NIU YOKA—Ena ika2 ni June, 2017 e vakavinavinakataki ira na iVakadinadina i Jiova na vakailesilesi ena korolevu o Oryol e Rusia. Qori ena nodra veivuke ena sasamaki e dau caka e veiyabaki era vakaitavi kina ena ika22 ni Epereli, 2017. Era bolecakacaka e 70 na iVakadinadina ena samaki na benu ena veigaunisala e Oryol, okati kina na uciwai na Orlik e koto ena loma ni korolevu qori. Era solia na vakailesilesi ni vanua qori e dua na iloloma me vakavinavinakataki kina na ka era cakava, qai volai toka kina: “Dua na ka na neimami vakavinavinaka ena nomuni veivuke ena itikotiko kei na kena samaki na koro.”

Oti ga e dua na vula nodra vakavinavinakataki na iVakadinadina ena ka era cakava, a vesu sara o Dennis Christensen (e tabaki toka e ra) e dua tale ga vei ira na veivuke. E beitaki ni ka e cakava ena ika25 ni Me e vakavuna na tiko yavavala, qori na nona tiko ena dua na nodra soqoni ni lotu. Era vakayagataka sara tiko ga na vakailesilesi na ile qori mera beitaki kina na iVakadinadina i Jiova e Rusia taucoko.

E kaya o David A. Semonian, na mata ni iVakadinadina i Jiova ena tikotiko liu: “Nodra veivuke ena itikotiko o Denis kei na so tale era lewe ni ivavakoso vata, e sega ni kurabuitaki vei ira na kila ni ratou iVakadinadina i Jiova . Sa vica vata na yabaki nodra veivuke voli mai ena sasamaki qori, ni vakatabui mada ga nodra cakacaka ena 2016 era se veivuke tiko ga ena sasamaki. Era kilai na iVakadinadina i Jiova e Oryol kei na veiyasa i vuravura nira dau ivakaraitaki vinaka. O Dennis e dua na lotu vaKarisito dau cakacaka qai muria na lawa ni matanitu, e dau veivuke ena itikotiko qai kilai ni dau veitokoni vei ira na vakailesilesi e Oryol, ia qo sa okati me vaka e dua na daubasulawa. Keimami nuidei tu ni na sere totolo o Dennis, me tomana tale na nona sokalou kei na veivuke ena itikotiko kei ira nona lewenilotu.”

E vesu o Denis Christensen ni oti e dua na yabaki na nodra vakatabui na iVakadinadina i Jiova e Oryol ena ika14 ni June, 2016. Ena ika20 Epereli, 2017 a beitaki o Christensen, e vakatulewataka tale ga na Mataveilewai Cecere e Rusia me sogo na valenivolavola ni iVakadinadina i Jiova e Rusia, e toka volekata na korolevu o St. Petersburg. Ena gauna qo era se vesuki Christensen toka vakawawa na vakailesilesi e Oryol.

Gusunivosa:

David A. Semonian, Valenivolavola ni iTukutuku, +1-845-524-3000