ST. PETERSBURG, Rusia—E kurabuitaki nira via sogota na vakailesilesi e Rusia na nodra valenivolavola na iVakadinadina i Jiova. E sega ni se bau yaco qori ena veigauna sa oti.

E veivakarerei ena dua na ivola na valenivolavola ni dauveibeitaki ni matanitu o Rusia ena ika2 ni Maji, 2016. E tukuna na matanitu o Rusia ni vakarautaka tiko na valenivolavola ni iVakadinadina i Jiova eso na ka e vakavuna na tiko yavavala. Sa soli e rua na vula me cakava e dua na ka ena veibeitaki ni matanitu, ke sega ena sogo na valenivolavola. E kaya o Yaroslav Sivulskiy, nodra gusunivosa na iVakadinadina i Jiova e Rusia: “Ke sogo na neimami valenivolavola, ena tauri kece na qele se vale e taukena, ena vakatabui tale ga na cakacaka vakalotu ni iVakadinadina i Jiova e Rusia.”

E kurabuitaki na ka e via cakava na matanitu ni se qai vakananumi oti ga na ika25 ni yabaki na kena rejisitataki ena imatai ni gauna na isoqosoqo ni iVakadinadina i Jiova e Rusia. A rejisitataki na isoqosoqo ena ika27 ni Maji, 1991, qai rejisitataki tale ena ika29 ni Epereli, 1999. E tiko na valenivolavola ni iVakadinadina i Jiova e Solnechnoye, rauta ni 40 na kilomita ena vuaira kei St. Petersburg. Na sogo ni valenivolavola e dua na tarabu ni matanitu o Rusia me saqati ira kina na iVakadinadina. Era tarova na vakailesilesi ena yabaki sa oti na kena vakau yani e Rusia na nodra ivola na iVakadinadina kei na nodra iVolatabu vakaRusia. Sega tale ni dua na vanua e vuravura me vakatabuya na website vakadonui ni iVakadinadina i Jiova na jw.org, o Rusia duadua ga. E kaya o Yaroslav Sivulskiy: “E vakayagataki cala tiko na lawa me vakacacani kina nodra sokalou na iVakadinadina i Jiova e Rusia. Keimami sega ni duavata ena vakatulewa qori na iVakadinadina i Jiova. Keimami vinakata me dokai neimami galala ni sokalou, me kua tale ga ni tarovi na neimami veivakavulici ena iVolatabu me vaka ga keimami sa cakava voli mai ena loma ni 125 na yabaki e Rusia.”

E tukuni ni cakacaka vata tiko kei na matanitu o Rusia na lotu Orthodox, ya na vuna era saqati ira kina vakalevu na iVakadinadina i Jiova na vakailesilesi. Era tokona na vakasama qori na veitabana ni itukutuku e veiyasa i vuravura. Kena ivakaraitaki, e kaya na New York Times ni nodrau cakacaka vata vakavoleka na matanitu kei na lotu Orthodox e rairai vakavuna tiko nodra saqati na iVakadinadina. De dua e bukana tiko o lotu na buli ni lawa ena vakaleqa nodra cakacaka na iVakadinadina kei na so tale na lotu e Rusia. E kaya na tabana ni itukutuku na Associated Press nira kurabuitaka o ira na dau valataka na galala ni sokalou na ka e cakava tiko na matanitu vei ira na iVakadinadina i Jiova e Rusia. E kaya na tabana ni itukutuku na Reuters “nira vakalolomataki na iVakadinadina i Jiova kei na levu tale era beitaki nira vakavuna na tiko yavavala e Rusia.” Ena dua na ripote e tabaka na niusiveva na Independent ena Tiseba 2015, e tukuni kina ni buli na lawa e Rusia me “tarova na vakacaca ni batikadi kei na vakaduduile.” Ia e kaya na mekesini The Huffington Post ena ika20 ni Maji, 2016, ni sa vakayagataki tale na lawa mera “veilewaitaki kina na lewe ni lotu e sega ni dau vakavu ca” me vaka na iVakadinadina i Jiova. Era sa kerea na iVakadinadina me rogoca tale nodra kudru na mataveilewai e Rusia kei na mataveilewai e dau valataka na dodonu ni lewenivanua e Urope. Ia e kaya na niusiveva The Moscow Times ena ika25 ni Maji, 2016, ni lawa vou se qai bulia ga qo o Rusia “e solia na galala ina kena mataveilewai me veisautaka na lewa era tauca na mataveilewai e veiyasa i vuravura.”

Na valenivolavola ni iVakadinadina i Jiova e Rusia e tuvanaka qai veitokoni ena nodra vakavulici ena iVolatabu na lewenivanua. E veivuke tale ga na valenivolavola ena cakacaka ni vakacoko e Rusia ni yaco na leqa tubukoso. Na iwiliwili ni lewenivanua e Rusia e sivia na 146,000,000, e sivia na le 175,000 na iVakadinadina i Jiova.

E kaya o David A. Semonian na gusunivosa ni iVakadinadina i Jiova ena itikotiko liu mai Niu Yoka: “Keimami rarawataka dina na nona via sogota na neimami valenivolavola e Rusia na matanitu. Era vakamuria voleka toka na iVakadinadina i Jiova kei na levu tale e veiyasa i vuravura na ituvaki e Rusia, era via raica se cava ena yaco.”

Gusunivosa:

Veiyasa i vuravura: David A. Semonian, Valenivolavola ni iTukutuku, talv. +1 718 560 5000

Rusia: Yaroslav Sivulskiy, talv. +7 812 702 2691