Ena ika15 ni Maji 2023, e kaya na minisita ni vuli e Rwanda, mera vakalesui tale i koronivuli na iVakadinadina i Jiova. Era vakatalai mai koronivuli e rauta ni 80 na gonevuli, nira sega ni vakaitavi ena soqo ni lotu ni sega ni vakatara na nodra lewaeloma.

E vakauta na minisita ni vuli e dua na ivola vei ira na mea kei na vakailesilesi ni koronivuli kece e Rwanda. E vola: “E sega ni dodonu me vakatalai e dua na gonevuli ena veika e vauca nona sokalou. E tokona na matanitu na nodra dodonu na lewenivanua e Rwanda ena veika e vauca na nodra rai, lewaeloma, lotu, sokalou kei na nodra tusanaka e matanalevu nodra vakabauta. Ena okati me basulawa, ke dua e tarova nona vuli e dua na gone qai rawa ni totogitaki. Me kua gona ni dua na gone e vakatalai mai koronivuli ena veika e vauca na galala ni nona rai, lewaeloma, lotu se sokalou. Mera tinia gona na vakailesilesi ni koronivuli na nodra vakalolomataki ira tiko na gone, mera vakasukai kece e koronivuli.”

E dua vei ira na gonevuli qori o Sister Jeanette Niyonkuru. E kaya: “Au vakacegui tu mai koronivuli me dua na yabaki. E mani vakadonui au e dua tale na koronivuli, ia au na taubale me rua na aua e veisiga meu lai vuli.” Eso tale na gone era sa biu vuli ni sa rui yawa na nodra koronivuli.

E tolu na luvedrau o Brother kei Sister Hakizimana. Ratou vakatalai mai koronivuli ni ratou sega ni vakaitavi ena veika vakalotu. E kaya o Brother Hakizimana: “Keirau volavola vei qasenivuli liu, ia e sega ni sauma mai neirau ivola. Keitou saga mada ga me keirau veivosaki kei dairekita ni koronivuli. Ratou vakamacalataka vei koya na gone na nodratou vakabauta vakaivolatabu, ia e sega ni caka kina e dua na ka. Keitou marautaka gona na veika e sa vakarota na minisita ni vuli. Keitou sa sota kei ratou na vakailesilesi ni yasana, ratou qai vakadonuya me ratou lesu i koronivuli na gone.”

Eda marautaka na nona tokona na minisita ni vuli na nodra dodonu na tacida gone e Rwanda. E vinaka tiko ga kina na nodra “lewaeloma” qai lagiti kina na yaca i Jiova.—1 Pita 3:16.