Ena ika16 ina ika18 ni Okosita, 2019 e vakayacori na imatai ni nodra soqo ni veiwasewase na tacida ena vosa vagalu ni Rwanda e Kigali, mai Rwanda. Era tiko kina e le 620, ratou papitaiso tale ga e le 8 na didivara.

Rau tiko tale ga ena soqo qori ena Sigatabu e rua na vakailesilesi ni matanitu o Mr. Jean Damascène Bizimana, e dua na dairekita ni Rwanda National Union of the Deaf, kei Mr. Emmanuel Ndayisaba, na vunivola ni National Council of Persons with Disabilities. Kuria ya, e tabaka tale ga na niusiveva na Ukwezi na totoka ni porokaramu ni soqo ena Sigatabu.

E kaya o Mr. Bizimana: “E vakasakiti dina na soqo qo! Au marautaka niu raica nodra soqoni ena duavata na didivara ena veivanua e Rwanda. Keimami vakavinavinakataki ira na iVakadinadina i Jiova ena nodra vukei na didivara. Qo na ka sara ga mera raica na vakailesilesi ni matanitu, mera vakatotomuria tale ga.”

Ena rua na yabaki sa sivi, e rawati e rua na cavuikalawa ena yalava ni vosa vagalu ni Rwanda. Kena imatai, ena Seviteba 2017 e vakadonuya na valenivolavola ni tabana e Rwanda me vakayacori na imatai ni Vuli ni Painia ena vosa vagalu. Kena ikarua, ena Seviteba 2018 e tauyavutaka na valenivolavola ni tabana me vakadewataki noda ivola vakaivolatabu ena vosa vagalu ni Rwanda.

E kaya o Brother Jean d’Amour Habiyaremye, e mata mai na valenivolavola ni tabana ena soqo qori: “Keimami marau ni raica na tubu ena yalava ni vosa vagalu ni Rwanda, okati tale ga kina na soqo ni veiwasewase qo. E kena usutu, ‘E Sega Vakadua ni Seavu na Loloma!’ Na porokaramu qo e vukei keda meda vakaraitaka tiko ga na loloma vei ira eso tale, wili kina o ira na didivara.”

E vakadinadinataki na veivakalougatataki i Jiova ena tubu sa rawati tiko ena yalava ni vosa vagalu!—Same 67:1.