Ena ika7 ni Maji 2021, era ciqoma e dua na iloloma talei na dautukutuku e Sauca Aferika. E sevutaka ena dua na ivunau e katoni o Brother Mark Sanderson e lewe ni iLawalawa Dauvakatulewa na New World Translation of the Christian Greek Scriptures ena vosa vaKwangali kei na vosa vakaSepulana. E sevutaki na New World Translation of the Holy Scriptures ena vosa vakaSetswana. Era sema yani na mataveitacini ni vakayagataki na monalivaliva (videoconference), era sa rawa ni download tale ga ina nodra iyaya vakalivaliva.

Eratou le tolu na vakadewataka na iVolatabu, eratou vakacavara nodratou vakadewa ena loma ni rua na yabaki. E sivia ni 240 na dautukutuku ena vosa qo. Era marautaka nodra iVolatabu vou ni rawarawa na kena wiliki, qai yaga vakalevu ena nodra vuli vakataki ira kei na cakacaka vakavunau.

Eratou le ono na vakadewataka na iVolatabu. E taura e dua veimama na yabaki na kena vakadewataki. Era le 374 na dautukutuku vosa vakaSepulana e Sauca Aferika.

E kaya e dua na daunivakadewa: “Keimami dau vakayagataka na ivakadewa ni iVolatabu vakaSepedi ena cakacaka vakavunau. Ni bera ni keimami vakamacalataka e dua na tikinivolatabu vua e dua, keimami na vakamatatataka mada se vakadewataka e dua se rua na vosa mai na tikinivolatabu qori. Ia ni keimami vakayagataka na vakadewa vou qo, e wiliki ga vakadua sa matata na kena ibalebale.”

E voleka ni va na yabaki na vakavoutaki ni iVolatabu qo. E le ono na tacida eratou vakaitavi kina. E sivia na 5,600 na dautukutuku era vosa vakaSetswana.

E kaya e dua na daunivakadewa me baleta na New World Translation ena vosa vakaSetswana: “Qo ena vukei ira na mataveitacini mera vakavinakataka nodra iwalewale ni cakacaka vakavunau, era na sega ni saga tale tiko mera vakamacalataka eso na vosa dredre. Ena yaga tale ga vakalevu ena nodra vuli vakataki ira. Na kato, mape, iyaloyalo kei na ivakamacala ni vosa, ena vukei ira na tacida mera raitayaloyalotaka na ka era wilika ena iVolatabu.”

Na iVolatabu e sevutaki qo ena vukei ira na tacida kei ira na tataleitaki ena nodra sasaga mera kauaitaka nodra bula vakayalo. Eda vakavinavinakataka vakalevu ni sautu na keda kakana vakayalo.—Aisea 65:13.