Ena ika6 ni Seviteba, 2019 e sevutaki na New World Translation of the Holy Scriptures ena vosa vakaVenda, vakaAfrikaan kei na vosa vaXhosa, ena soqo ni veimatanitu e vakayacori e Johannesburg, e Sauca Aferika. E sivia na le 16 na milioni era vosataka na vosa qori. E sevutaka na iVolatabu qori o Brother Anthony Morris, e lewe ni iLawalawa Dauvakatulewa. E vakayacori na soqo ena FNB Stadium, ra qai tiko kina e le 36,865. Kuria ya, era le 51,229 mai na walu tale na vanua era sema mera vakarorogo ena porokaramu qori, wili kina o Lesotho, Namibia, kei Saint Helena.

E kaya e dua na daunivakadewa ena ka e duatani kina na iVolatabu qo: “Keimami marautaka kece me keimami wilika tasevu na iVolatabu ena vosa e tara dina na lomai keimami!” E kaya e dua tale na daunivakadewa: “Koya e bibi, [na iVolatabu vou qo] ena vakavolekati keimami vei Jiova, ni levu na vanua sa laurai kina na yacana.”

Ena vukei ira tale ga vakalevu na mataveitacini ena cakacaka vakavunau. E kaya e dua na daunivakadewa ena vosa vaXhosa: “Ena veivuke sara vakalevu ena cakacaka vakavunau na New World Translation qori. Ena totolo nodra kila na lewenivanua na ka e vakamacalataki ena iVolatabu, sega ni vinakati me vakamacalataki tale vei ira na vosa yadua.” E kaya e dua na daunivakadewa ena vosa vakaAfrikaan: “O na kila vinaka na ka e vakamacalataki ena veitikinivolatabu, sega ni vinakati me vakamacalataki tale.”

Eda marautaka kei ira na tacida na kena sevutaki na iVolatabu qori, e rawarawa na kena wiliki ni na vukei ira mera toro voleka vua na Kalou.—Jemesa 4:8.