Tekivu mai na ika29 ni Janueri ina ika11 ni Maji 2024, era vakaitavi ena cakacaka vakavunau ena vosa vaXhosa e sivia ni 11,000 na mataveitacini ena yasana o Eastern Cape, e Sauca Aferika. E sivia ni le vitu na milioni ena yasayasa qori era vosataka na vosa vaXhosa. Na cava e rawati ena cakacaka vakavunau qori? E sivia ni le 2,700 era via vulica na iVolatabu.

Rau vunau e rua na tacida yalewa vua e dua na marama a mate o ganena ena dua na vakacalaka ena rua na macawa yani e liu. E tagi na marama qori ni vakamacalataka tiko nona mate o ganena, ia rau qai vakacegui koya na tacida ni rau wilika vua na Vakatakila 21:​3, 4. E via kila sara ga na yalayala ni Kalou ena iVolatabu ni na vakaotia na mate kei na rarawa, e mani tarogi rau na tacida na gauna kei na vanua e caka kina noda soqoni. E tekivu vulica tale ga na iVolatabu.

E vunau na tacida yalewa o Zukiswa kei na nona itokani vua e dua na marama e tauvi sasala. Na mate qori e vakadredretaka me vakarautaka na kedratou na luvena. E lomaleqataka gona na ka me ratou kania baleta ni sega ni rawa ni balia na madrai. E mani kaya o Zukiswa vua na marama qori ni na vukei koya, o nona itokani sa qai vunau vua. Dua na ka na nona qoroya na marama qori nodrau kauai kei na nodrau veivuke na tacida, e lai tukuna sara vei ira nona itokani na ka rau cakava. Oti e vulica sara na iVolatabu.

Rau vunau tiko e rua na tacida tagane ena siti o Gqeberha, rau sotava e dua na tagane e musu e dua na yavana. E kaya sara na tagane qori me vaka ni taukeni keda na Kalou, e dau vaqaqa na vuna e vakalaiva kina na Kalou me lewa na vuravura o Setani. (1 Joni 5:19) Rau sauma na tacida na nona taro ni rau vakayagataka na iVolatabu. Ena siga tiko ga ya, rau sarava vakaveiwatini na vidio e kena ulutaga, Na Cava e Vakatara Tiko Kina na Kalou na Rarawa? Ni rau sarava oti, rau taleitaka me rau vulica na iVolatabu.

E vunau tale ga e dua na tacida yalewa vua e dua na marama e Gqeberha, e mani kerei koya me wilika na Same 37:29. Ni wilika oti na marama ya mai na nona iVolatabu, e kaya ni sega ni matata vua. E mani wilika na tacida yalewa na tikinivolatabu qori mai na New World Translation ena vosa vaXhosa. E kaya na marama ya: “E rogo matau dina na vosa vaXhosa e vakayagataki ena iVolatabu qori. E matata sara ni vakatauvatani kei na noqu iVolatabu!” Qo sa marautaka tiko nona vulica na iVolatabu.

Eda marau ni levu era vosa vaXhosa ena veivanua e Sauca Aferika era sa ciqoma na itukutuku ni inuinui, e vakarautaka na “Kalou e dau vakacegui keda ena ka kece” ena iVolatabu.​—2 Korinica 1:3.