Ena ika28 ni Janueri 2021, e vakatulewataka na Mataveilewai Cecere e Sauca Korea ni sega ni okati me basulawa nona sega ni via curu e dua ina mataivalu. Kena ibalebale, era na sega ni veilewaitaki o ira na tacida era sotia tu i liu.

O ira kece na tagane e Sauca Korea era sotia tu i liu era dau kacivi ina keba ena loma ni walu na yabaki mera vakavulici. Koya gona, era dau kacivi tale ina keba o ira na tacida tagane, qai totogitaki ke ra sega ni via vakavulici. Kena ivakaraitaki, dua na tacida tagane a kacivi vei ira na ovisa, loya dauveibeitaki, qai veilewaitaki me sivia e 60 na gauna ena dua na yabaki.

Ena 2018, e vakataulewataka e rua na mataveilewai cecere e Korea, ni sega ni okati me basulawa na sega ni curu ina mataivalu. E vakarautaka tale ga na cakacaka me isosomi ni sega ni via curu ena mataivalu. Ia e sega ni tukuna e dua na ka me baleta na lawa e vakavuna nodra totogitaki na tacida.

Na lewa e tauca qo na Mataveilewai Cecere, e dusia ni sega ni cala nona sega ni via curu e dua ina mataivalu ena vuku ni nona lewaeloma. O ira gona na tacida era vosota tu mai vakabalavu nodra veilewaitaki, era sa rawa ni kerea mera vakaitavi ina cakacaka e sosomitaka nodra sega ni via curu ina mataivalu. Era na sega ni totogitaki se bala e valeniveivesu. Dua vei ira na veilewaitaki o Brother Nam Tae-hee, e kaya: “Ni oti e levu na gauna noqu veilewaitaki tu mai ena loma ni walu yabaki, sa qai dokai qo na noqu dodonu. E vaka e taluva sara ga e dua na icolacola levu.”

Eda duavata kei ira na tacida e Korea kei na nodra vuvale nida vakavinavinakataki Jiova ni vukei ira mera ‘vosota na veivakacacani, kei na veika tawadodonu ena vuku ni nodra lewaeloma vua na Kalou’!—1 Pita 2:19.