Ena ika30 ni Epereli 2023, e mai vakaoti na kena vakavinakataki e dua na tabavale ena valenivolavola ni tabana e Korea. Era dau vakaicilitaki kina na lewe i Peceli. Sa oti qo 30 na yabaki na kena vakayagataki. E vakavinakataki tale ga na vale ni kana e Peceli kei na 62 na nodra rumu na lewe i Peceli. E caka na tarataravaki me kua ni vakasabusabutaki na wai kei na livaliva, mera taqomaki vinaka tale ga na tacida era veiqaravi. Era bolecakacaka e 170 na tacida, e 71 vei ira qori era se bera vakadua ni vakaitavi ena noda tarataravaki. Ni oti nodra vakavulici qai vakaitavi ena tarataravaki ena Peceli e Korea, e sa rawa nira lai veivuke ena tarataravaki ena so tale na vanua e sivia na le 40 na tacida.

E kaya o Sister Kim Ha-yeon: “Niu vakavulici vinaka ena tarataravaki ena Peceli e Korea, au marau niu sa rawa ni lai veivuke ena tarataravaki e Indonesia.”

E kaya o Brother Lee Myong-Hoon, e veivuke tale ga ena tarataravaki ena valenivolavola e Korea: “Levu sara ga na ka au vulica ena gauna ni tarataravaki. E dredre toka na noqu itavi. ia au qarava rawa niu muria na veidusimaki mai na isoqosoqo.” E sa marautaka tiko ena gauna qo o Brother Lee nona veivuke ena tarataravaki ena Yatu Filipaini.

Eda marautaka ni mai oti na vakavinakataki ni valenivolavola ni tabana e Korea. Eda vakavinavinakataka na nodra gugumatua na tacida, wili kina o ira era sa lai veivuke ena so tale na tarataravaki, nira ‘cakacaka ena vakabauta kei na sasaga.’—1 Cesalonaika 1:3.