Ena Lotulevu na ika30 ni Okosita, 2018, e rogoca na Mataveilewai Cecere e Sauca Korea na nodratou kisi e tolu na iVakadinadina i Jiova, ni ratou sega ni vakaitavi ena ivalu ena vuku ni nodratou vakabauta. E vakavu veivosaki vakalevu ni sa dua toka na gauna dede nona balati ira tiko e valeniveivesu na sega ni curu ena mataivalu na matanitu o Korea. E va na aua na nodra vakatarogi ratou na loya ni iVakadinadina i Jiova, kei na so tale na ka e vauca na veika qori na le 13 na turaganilewa. Era vakamacalataka na turaganilewa na vakatulewa ni Constitutional Court ena ika28 ni June, 2018. E vakaroti kina na boselawa e Korea me vakarautaka na cakacaka e rokovi kina na nodra vakabauta, me kua ga ni balati ira tiko e valeniveivesu me vaka e dua na daubasulawa. Ratou kerea na loya ina Mataveilewai me vakaraitaka ni sega nodratou cala na le tolu na tacida qori. Na vakatulewa ena tau qori ena qai vakatau kina nona vakataulewa na mataveilewai e ra me baleta e sivia na 900 na kisi vata ga qori se tu vakawawa. Sa na qai vakatau sara ga qo ina Mataveilewai Cecere me vakatulewataka na gauna, kei na ka ena cakava me vakatulewa kina vei ratou na tolu na tacida.

Eda nuidei kei ira e sivia na 100 na tacida yalodina era se tiko e valeniveivesu nida na waraki Jiova tiko ga na Kalou e noda ivakabula.—Maika 7:7.