SEOUL, Korea—Ena dua na veitarotarogi e caka, e laurai ni tubu na kedra iwiliwili na lewenivanua e Korea era tokona na vakatulewa ni matanitu mera kua ni vesu na sega ni curu ina mataivalu ena vuku ni nodra vakabauta. Ena Noveba 4-7, 2013, era vakatarogi e rauta ni le 1,211 na tagane kei na yalewa ni Korea qai 68 na pasede era tukuna mera kua ni vesu, mera vakaitavi ga ena cakacaka raraba. E vakaraitaka qori ni sa veisau na nodra rai e levu, ni vakatauvatani kei na 29 na pasede era tokona na rai qori ena 2008.

Eso tale ga na loya, turaganilewa, kei na daubulilawa e Korea era duavata kei na vakatulewa mera kua ni vesu na sega ni curu ina mataivalu ena vuku ni nodra vakabauta. O Han In-seop e parofesa ena Koronivuli ni Lawa e Seoul National University, e vola na ulutaga “Dilemma Surrounding Conscientious Objection to Military Service” ena dua na niusipepa: “Sega ni dua na turaganilewa ena kaya nira cala bibi o ira na sega ni curu ina mataivalu ena vuku ni nodra vakabauta. E sega ni ganita mera vesu nira sega ni via dro. Era dau veivutuni tale ga na turaganilewa qai ca nodra lewaeloma nira vakataulewa mera vesu o ira qori.”

E vakabibitaki sara ga na dodonu ni lewenivanua qo ena dua na vidio e vakarautaka na National Human Rights Commission of Korea (iSoqosoqo ni Dodonu ni Lewenivanua e Korea). E vakaraitaki kina e dua na ivakamacala lekaleka na yacana na “Ice River,” e baleta e dua na iVakadinadina i Jiova a sega ni curu ina mataivalu ena vuku ni nona vakabauta. E tukuna na dairekita ni vidio qo e vakaraitaka na ka era sotava na drau na iVakadinadina i Jiova era vesu e Korea e veiyabaki ena vuku ni nodra vakabauta. E laurai ena ripote e tabaka na United Nations Human Rights Council ena June 2013, ni iVakadinadina i Jiova kece era vesu tu ena vuku ni nodra vakabauta, e 93 na pasede era vesu tu e Sauca Korea.

Gusunivosa:

Veiyasa i vuravura: J. R. Brown, Valenivolavola ni iTukutuku, talv. +1 718 560 5000

Republic of Korea: Dae-il Hong, talv. +82 31 690 0055