Sa rauta ni 65 na yabaki qo na nodra dau bala tiko e valeniveivesu na tacida tagane gone ni Sauca Korea nira sega ni via vakaitavi ena mataivalu. Ia ena Lotulevu na ika28 ni June, 2018 e veisautaka na lawa qori na Mataveilewai Levu ena dua na vakatulewa vakairogorogo. E bokoci kina e dua na Lawa ni Mataivalu e tiko ena Lawa 5 ena parakaravu 1, ni sega ni dua tale na digidigi me soli vei ira na tawaveitovaki ena ivalu.

Ratou a vakatulewa kina e ciwa na turaganilewa, nodratou iliuliu na Turaganilewa Levu o Lee Jin-sung. E ono ratou tokona na vakatulewa qori qai le tolu ratou saqata. Na vakatulewa qori e tokoni kina na lawa era sa muria tiko e levu na veimatanitu, oya na kena dokai nodra lewaeloma, nanuma, kei na nodra vakabauta na lewenivanua.

Ni vakatauvatani kei na veimatanitu tale eso, e levu duadua tiko na iwiliwili ni kaivesu e Sauca Korea baleta ga nira tawaveitovaki ena veika vakaivalu. Dua na gauna e tiko na kena ivakatautauvata ena 500 ina 600 na tacida era bala e valeniveivesu e veiyabaki. E dau vakaloloma nira sa sere ni sa kilai tu na kedra itukutuku nira bala e valeniveivesu, ra sotava kina e levu na ka rarawa eso mada ga era sega ni cakacaka saumi rawa.

Me tekivu ena 2011, era volavola eso na tacida ina Mataveilewai Levu ni sega ni bau vakarautaka na lawa e dua tale na digidigi vei ira na tawaveitovaki. Ia mera sa na bala ga e valeniveivesu. E yaco tale ga qori ena itekitekivu ni 2012, era raica eso na turaganilewa ni cala nodra totogitaki tiko na tawaveitovaki qori, ra vakatulewataka me dikevi tale nodra kisi kei na lawa ni mataivalu ena Mataveilewai Levu.

Ena qai vakatulewataka na Mataveilewai Levu ke dua na lawa e salasalavata kei na yavu ni vakavulewa e Korea se sega. Ni tokona vakarua (ena 2004 kei na 2011) na lawa ni mataivalu mera totogitaki na tawaveitovaki, sa nanuma na Mataveilewai Levu me sa vakayacori na veisau. E vakarota na Mataveilewai me vola tale na Matanitu o Sauca Korea na lawa me soli eso tale na digidigi vei ira na tawaveitovaki ena ivalu ni bera na icavacava ni 2019. Na digidigi qori e okati kina na cakacaka e valenibula kei na so tale, e sega ni sema ina veika vakaivalu era yaga ga ina bula rarawa ni dua na itikotiko.

Me kilai na bibi ni vakatulewa qori e kaya na gusunivosa ni iVakadinadina i Jiova e Korea o Brother Hong Dae-il: “E kaukaua duadua na Mataveilewai Levu ni dau taqomaka na nodra dodonu na lewenivanua, qai vakarota na matanitu me walia na leqa qori. Era tu vakarau na tacida mera digitaka eso tale na tabana ni veiqaravi ena sega ni ca kina nodra lewaeloma, e tautauvata tale ga kei na veika era sa cakava tiko eso na veimatanitu.”

So tale na kisi era se bera ni vakatulewataki, okati kina ratou na le 192 na iVakadinadina i Jiova ratou vesu tiko ena gauna qo, kei na 900 na veilewai era se bera tiko ni rogoci ena vica vata na mataveilewai.

Na vakatulewa gona ni Mataveilewai Levu qo ena uqeta na Mataveilewai Cecere me kua ni vakatau itotogi vei ira na tawaveitovaki ena veika vakaivalu. Ke ra veitokoni kece kina na Turaganilewa ena Mataveilewai Levu, ena uqeta sara ga na ivakarau ni kena dau rogoci yadua na kisi ni veilewai.

E namaki me na rogoci raraba na kisi qo ena Mataveilewai Cecere ena ika30 ni Okosita 2018, ena qai tau na kena lewa ni oti vakalailai qori. Qo se qai imatai ni gauna ena 14 na yabaki sa sivi mera vakaitavi kece kina na Turaganilewa ena Mataveilewai Cecere ni dikevi tale na veika e vauca na tawaveitovaki ena ivalu.

Sa cakacaka tale tiko ga na tabana e qarava na veika vakalawa e Korea na National Assembly me dikeva tale na Lawa ni Mataivalu (se na Military Service Act).

E kaya o Brother Mark Sanderson, e dua na lewe ni iLawalawa Dauvakatulewa: “Keimami sa rai vakanamata tiko ina vakatulewa ni Mataveilewai Cecere. Era dau vakauai ira ena nodra dodonu ni tu galala na tacida e Korea nira kila ‘ke dua e vosota na veivakacacani se na veika tawadodonu ena vuku ni nona lewaeloma qori e vinaka vua na Kalou.’ (1 Pita 2:19) Eda marau ni yaga na nodra dau vosota tu mai vakadede na lewa ca, era doudou tiko ga, ra qai muria nodra lewaeloma e vakavulici.”