A vakayacori ena ika9 ina ika25 ni Feperueri kei na ika9 ina ika18 ni Maji, 2018, na Pyeongchang Olympic kei na Paralympic Winter Games. Era tuvanaka sara na tacida e Korea na cakacaka vakavunau e veisoliyaki kina vei ira na vulagi na ivola vakaivolatabu e sega ni saumi.

Era vakaitavi ena cakacaka lavotaki qo e sivia ni 7,100 na tacida. E levu era gole mai na siti o Busan, Gwangju, Incheon, Seoul, kei Suwon. Eso tale era gole mai na vanua yawa me vakataki Jeju Island, qo e dua nodra igadigadi na saravanua qai sivia na 300 na maile na kena yawa ena ceva kei Pyeongchang.

Era vakarautaka na tacida e 152 na qiqi ni vunau e matanalevu ra qai biu ena 48 na vanua. E wili tale tiko ga kina na Gangneung Olympic Park kei na Pyeongchang Olympic Plaza. E vakatarai tale ga mera vakaraitaka na tacida eso na ivola ena dua na matamata ena tabana ni lotu ena Olympic Village.

Era vakadonuya tale ga na vakailesilesi me biu na qiqi e Gangneung Station Square. Qori na vanua e dau kele kina na sitimanivanua na KTX Gyeonggang Line, ni kauti ira mai na pasidia e Incheon kei Seoul mera gole i Pyeongchang. E sivia ni 28,000 na tamata era lakova na Gangneung Station ena imatai ni siga ni Olympic Game.

Me rawa nira vukei vakayalo na 80,000 na vulagi, era vakarautaka kina na tacida na ivola, brochure, mekesini kei na tikidua ena sivia na 20 na vosa, wili kina na vosa vakaJaina, vakavalagi, vaKazakh, vaKorea, kei na vosa vakaRusia. O ira na tacida era vosa vagalu vaKorea era vakayagataka tale ga na qiqi e biu kina na vidio ni vosa vagalu me kidavaki ira na didivara era gole ena Paralympic. E veisoliyaki e sivia e 71,200 na ivola, wili kina e sivia e 22,000 na ivola ni veisureti ni iVakananumi.

Era vakayagataka na iVakadinadina i Jiova e veiyasa i vuravura e sivia na 300,000 na qiqi me vakaraitaki kina na ivola ena sivia na 35 na vanua. Qo e dua na sala era vunau rawa kina ena vanua era tu kina na tamata, era vakacavara vinaka tale ga kina nodra itavi vakaitalatala.—2 Timoci 4:5.