Ena ika15 ina ika31 ni Tiseba, 2022, e imatai ni gauna mera vakaitavi kina na iVakadinadina i Jiova ena dua na soqo e Senegal, e vakatokai na Dakar International Fair (FIDAK). Sa oti qo e 30 na yabaki na kena vakayacori na soqo. E dau vakaraitaki kina na cakacaka ni liga, eso na veiqaravi vei ira na lewenivanua kei na veika me baleta na itovo vakavanua. Era dau mai sarasara e vica vata na udolu mai Aferika kei na veiyasa i vuravura.

Era vakarautaka na tacida eso na itukutuku e kau mai na jw.org kei na noda ivola me baleta na bula vakavuvale. Era vakaraitaka na vidio mai na iwasewase Mo iTokani i Jiova, kei na Droini Yavala. E saravi tale ga na vidio ni nodra ivakamacala na itabagone ena iwasewase, Ka Era Kaya Nomu iCaba.

Eso na vulagi era sega ni kila na noda website, era mani rai kina nira vakayagataka na nodra talevoni. Levu era qoroya ni vakadewataki na jw.org ena sivia na 1,000 na vosa. E okati mada ga kina na vosa e dau vakayagataki vakalevu e Senegal, na vosa vakaWolof. E veisoliyaki e sivia ni 3,000 na ivola vei ira na sarasara.

E kaya e dua na vulagi, “Ena neitou gade mai ena soqo qo, e yaga duadua na neitou sikova yani na nomudou vanua ni sarasara.” E kaya e dua tale, “Ke dau caka na veisisivi, ena soli sara ga vei kemudou na icocovi!”

E kaya o Brother Martin Laud, e veivuke ena kena tuvanaki na noda vanua ni sarasara: “Dua na ka marautaki noda kidavaki ira na vulagi mai na veiyasa i vuravura. Levu era vakavinavinakataka ni soli wale vei ira na itukutuku yaga mai na iVolatabu.”

Eda marautaka ni yaga na noda vakaitavi ena soqo qo. Qori e dua tale na sala eda rawa ni wasea kina na dauveiqaravi i Jiova na “vuku” mai na Vosa ni Kalou.—Vosa Vakaibalebale 3:21, 22.