Ena ika17 ina 26 ni Me 2024, e sivia ni 600 na tacida e Serbia kei Montenegro era vakaitavi ena vunau lavotaki ena veivanua tuyawa kei Serbia. Ena sivia na 20 na yabaki sa oti, qo sa qai matai ni gauna mera cakacaka vakavunau lavotaki kina na mataveitacini e Serbia. E tukuni ni sivia e le 1.5 na milioni era tiko ena vanua yawa (qori e rauta ni 25 na pasede na lewenivanua kei Serbia), e dredre kina mera tarai wasoma. E vakasakiti gona ni sivia e le 1,800 era vinakata mera vulica na iVolatabu donuya na gauna qori.

Dua na marama e tiko ena tauni o Beli Potok, e taleitaka nona veitalanoa kei na rua na tacida. Oti e qiriti ira sara na tiko veitikivi qai kaya: “Era lako tiko yani qori eso mera tukuna na veika me baleta na Kalou kei na iVolatabu. Ni vakarogoci ira vinaka!” Sa nanamaki sara tu e dua na marama ena iotioti ni vale, e kidavaki rau na tacida ena marau qai sureti rau i nona vale. E tukuna sara vei rau ni a tiko ena iVakananumi ni mate i Jisu. E vinakata na marama qori me vulica na iVolatabu.

Rau tiko ena qiqi ni vunau e rua na tacida ena tauni o Smederevska Palanka. E mani gole yani vei rau e dua na turaga o Radomir. E kaya ni marau ni raici ira eso era vakabauta na Kalou. E kauai sara o Radomir ni tabaki tu ena qiqi na vuli iVolatabu e sega ni saumi. Oti rau vakamacalataka na tacida na iwalewale ni vuli, qai vinakata sara ga na turaga qori me vulica na iVolatabu.

Era vakalougatataki dina na mataveitacini e Serbia ena vunau lavotaki qo kei ira era via vulica na iVolatabu.​—Joni 7:37.