4 ME, 2020
SIERRA LEONE
Sevutaki na New World Translation of the Christian Greek Scriptures ena Vosa vaKrio
Sevutaki na iVolatabu e Sierra Leone ena Retio kei na Tivi
Ena ika26 ni Epereli 2020, era marautaka e sivia ni 2,000 na dautukutuku era vosa vaKrio e Sierra Leone, na kena sevutaki na nodra New World Translation of the Christian Greek Scriptures.
Era sega ni soqovata na mataveitacini ena soqo lavotaki qo ena vuku ni vakatatabu ni matanitu ena matedewa na coronavirus. Era sega tale ga ni sarava rawa na porokaramu ena Internet ni levu na tacida e Sierra Leone e sega na nodra iyaya vakalivaliva, vakabibi o ira na tiko ena tauni lalai.
E sevutaka o Brother Alfred Gunn, e lewe ni Komiti ni Tabana e Liberia na New World Translation of the Christian Greek Scriptures ena vosa vaKrio
Sa qai vakadonuya na Komiti ni Veivakavulici ni iLawalawa Dauvakatulewa me katoni na ivunau ni kena sevutaki na iVolatabu ena valenivolavola ni tabana e Liberia, e qarava tiko na cakacaka e Sierra Leone. Sa qai tukuni vei ira na dautukutuku mera sarava na vunau lavotaki qori ena tivi, se rogoca ena retio. Ia era sega ni kila ni na sevutaki kina na iVolatabu.
Ni se vo e vica na siga me sevutaki kina iVolatabu, sa vakau rawa vei ira na dautukutuku na waqanivola e tawa tiko kina na nodra iVolatabu. E volai tale ga kina mera kua ni dolava na waqanivola me yacova na siga mera sarava se rogoca kina na porokaramu.
O Sister Megan Diaz e veiqaravi tiko ena vanua e vinakati kina vakalevu na veivuke e Sierra Leone. E kaya ni oti ga na porokaramu: “E qiri mai noqu vuli iVolatabu, e kaya ni rogoca tale ga na vunau. Dua na ka na nona vakavinavinakataki Jiova ni vakarautaka mai na iVolatabu qo! Ni keirau qai vuli nimataka, keirau sa na vakayagataka sara.”
E kaya o Tounkara e dua na vuli iVolatabu e vosa vaKrio: “E vakadinadinataki ena sevutaki ni iVolatabu qo ni vinakata o Jiova mera rogoca na tamata kece na nona itukutuku. Me rawa nira vulica, mera kila vinaka tale ga mera vakavulici ira kina na luvedra. Au marautaka sara ga na vakadewa ni iVolatabu qo ena noqu vosa ni sucu!”
Era vosataka vakalevu na vosa vaKrio e levu na lewenivanua e Sierra Leone, e veicurumaki tiko kina na vosa vakaValagi kei na nodra vosa ni vanua. Ratou vakadewataka na iVolatabu qori e va na daunivakadewa me rua veimama na yabaki. Sa tu na iVolatabu qori ena jw.org, sa rawa ni download ena Moniti na ika27 ni Epereli.
Eda duavata kei ira na tacida e Sierra Leone, nida vakavinavinakataka vei Jiova na vakadewa ni iVolatabu qo ena vosa vaKrio. Qo e dua tale na ‘iloloma vinaka qai isolisoli uasivi’ mai vua na Tamada vakalomalagi o Jiova.—Jemesa 1:17.
Rawa ni o Wilika Tale ga
TARO E TAROGI WASOMA
E Tiko Nomuni iVolatabu na iVakadinadina i Jiova?
E rawa ni o vakavinakataka na ivakarau ni nomu vuli ni o vakayagataka e levu na vakadewa ni iVolatabu. Qo e tolu na tikina mo kila tiko me baleta na iVolatabu na Vakadewa ni Vuravura Vou.